Blóð, sviti, tár

Laugavegurinn 2009

2009-07-22T22:59:00.043Z

Laugavegurinn 2009 mun standa uppúr sem einn af hápunktum ársins hjá mér. Ég komst í hlaupið af biðlista og var lengi að koma mér í gang með æfingar. Byrjaði eiginlega ekki fyrr en seinnipartinn í apríl. Ég hljóp eitt maraþon í undirbúningnum og er því lýst í annarri færslu.
Þegar ég skráði mig á biðlistann var það með hálfum hug því ég var ekki viss um að ég gæti undirbúið mig sómasamlega fyrir hlaupið. Veturinn var erfiður og hlaupamagnið í sögulegu lágmarki. Þegar ég fékk póstinn frá keppnishöldurum ákvað ég þó að láta slag standa og reyna að undirbúa mig sómasamlega fyrir þrekraunina. Ef undirbúningurinn færi í vaskinn myndi ég þó allavega geta skrölt þetta á 8 klukkutímum og reynt að njóta leiðarinnar.

Undirbúningur:
Undirbúningurinn var ekki langur, en þar sem ég hafði hlaupið nokkuð reglulega í rúm 15 ár taldi ég að það kæmi ekki mikið að sök. Fyrsta hlaup væri hvort sem er meira könnunarleiðangur en keppni. Eftir maraþonið hélt ég áfram að auka við æfingamagnið og hljóp ég eitt langt hlaup í viðbót, einnig tók ég þátt í miðnæturhlaupinu og tók 10 kílómetrana á 40:37 sem ég er mjög sáttur við. Ég reyndi að hafa æfingarnar fjölbreyttar og hafa hæfilega blöndu af rólegum og hröðum æfingum, brekkum og sléttlendi. Það tókst að mestu, nema hvað ég hefði átt að æfa uppgöngu og niðurhlaup í miklum bratta sérstaklega. Tveim vikum fyrir hlaupið gekk ég leiðina á tveim dögum ásamt syni mínum, bróður mínum og hans syni og einum öðrum feðgum. Fyrri daginn var niðaþoka og rigning, þannig að ég fékk ekki mikla tilfinningu fyrir fyrri hluta leiðarinnar. Seinni daginn var háskýjað og þurrt, jafnvel lét sólin svo lítið að sýna sig öðru hvoru.
Eftir gönguna fór fjölskyldan í 9 daga tjaldútilegu um Vestfirði. Ég náði að æfa þokkalega og hafði ágæta tilfinningu fyrir hlaupinu. Heim var komið að kveldi miðvikudags. Fimmtudagurinn fór í rólegheit. Bíllinn var þrifinn og farið yfir búnað. Um kvöldið útbjó ég mér orkubita að hætti Gísla. Ég bætti um betur og súkkulaðihjúpaði þá. Það var aðallega gert til að losna við klístrið og fá smá auka koffín.

Stóri dagurinn:
Ég sótti gögnin á föstudeginum og pakkaði ofan í tösku. Veðurspáin var nokkuð góð, hægviðri, sæmilegur hiti og að mestu þurrt, en í ljósi þess að veður á hálendi Íslands getur brugðið til beggja vona pakkaði ég meiru en minna niður. Fyrir háttinn smurði ég mér tvær góðar samlokur með smjöri, skinku, osti, grænmetissmyrju og brakandi fersku salatblaði úr garði tengdaforeldra minna. Að auki setti ég banana, appelsínusafa og kókflösku í nestisboxið. Ég fór að sofa um tíu leitið, þar sem rútan átti að fara kl. 4:30 frá Engjaveginum.
Laugardagsmorguninn 18 júlí vaknaði ég klukkan 3:50, gúffaði í mig vel söltum hafragraut og pakkaði niður nestinu. Það var syfjaður hópur sem lagði af stað frá Reykjavík. Ég var í fyrsta ráshóp og voru því helstu sleggjurnar í minni rútu. Í Hrauneyjum var stoppað og etinn árbítur. Meðan pöpullinn stóð í morgunverðarbiðröðinni snæddi ég minn heimagerða árbít og ræddi við félaga Lárus um landsins gagn og nauðsynjar. Við renndum inn í Landmannalaugar hálftíma fyrir hlaup og hafði ég því í nógu að snúast við að græja mig fyrir hlaupið. Veðrið var frábært og ákvað ég á síðustu stundu að vera í hnébuxum, stuttermabol og vindjakka, þar sem eg vissi ekki hvernig veðrið væri á skerinu. Ég var nestaður brúsa af orkudrykk og tveim orkustöngum. Tveim mínútum fyrir hlaup var ég svo kominn í stíuna og ekkert annað að gera en að bíða eftir rásflautunni. Planið var að taka þetta á 6 klst og nú var að sjá hvort það tækist.

Landmannalaugar - Hrafntinnusker (1:10:30):
Þegar gall í rásflautunni mjakaðist hópurin upp eftir einstiginu. Ég í hógværð minni hafði plantað mér aftast í röðina og fyrstu 200 metrarnir voru röltir á 3 mínútum. Tilfinning var góð, næringarástand gott og smá tími til að rabba við gamlan skólafélaga sem ég hafði ekki séð í nokkurn tíma. Smám saman greiddist úr hópnum og röltið varð að röskri göngu með smá skokki inn á milli. Ég færði mig smám saman framar í hópinn. Þegar út í keppni er komið, vilja föðurlegar ráðleggingar mér eldri og reyndari manna gleymast, og það gerðist hér. Fljótlega var ég kominn á hæla Rakelar Ingólfsdóttur og fleiri sem ég vissi að voru að stefna á 5:30. Lágvær innri rödd sagði mér að slaka á og hægja á, en í innstæðulausu sjálfsáliti mínu þaggaði ég snarlega niður í henni -- ég var svo mikið að "fíla" mig -- Ég kom inn í Höskuldarskála á tímanum 1:10:30 sem er allt of hratt. Þar stoppaði ég í eina mínútu og gaf mér góðan tíma til að fá mér vatn og orkudrykk og losa um reimar á vinstri skó, sem ég hafði reimt aðeins of fast.

Hrafntinnusker - Álftavatn (1:11:35):
Fljótlega eftir að ég lagði af stað frá skerinu fór ég að finna fyrir stífleika aftan í hægra læri. Ég ákvað því að hægja aðeins á mér og sjá hvort þetta lagaðist ekki. Það gerðist því miður ekki og bröltið á fyrsta leggnum var farið að segja til sín. Ég virkaðir þungur og þreyttur og ferðin niður Jökultungurnar var mjög erfið. Þarna kom berlega í ljós að ég kann illa að hlaupa niður brattar brekkur. Neðarlega í brekkunni þusti vinnufélagi minn, Róbert Gunnarsson fram úr mér og virkaði hann mjög léttur á fæti. Ég ákvað með sjálfum mér að reyna að fylgja honum eftir því ég taldi að ég ætti að vera hraðari en hann á jafnsléttu, þó hann hefði augljóslega talsverða yfirburði í brekkunum. Eftir Grashagakvíslina tekur við nokkuð sléttur og greiðfær kafli og þar hélt ég ágætis dampi. Þó var ég kominn með leiðinda sting í vinstri ristina, ekki þó svo mikinn að það háði mér. Í bakþankanum var samt sú staðreynd að það voru einmitt verkur á þessum stað sem héldu mér frá hlaupum í tvo mánuði fyrir 2-3 árum síðan. Tíminn í Álftavatni var 2:23 eða talsvert frá áætluðum tíma. 21 kílómetri að baki og 34 eftir (kom reyndar í ljós að þeir voru bara 32).

Álftavatn - Emstrur (1:46:28)
Ég stoppaði stutt í Álftavatni og hljóp svo með Róberti á meðan mér entist þrek til. Hann var sprækur og skildu leiðir við Bratthálskvíslina. Ég sá þarna að líklega myndi takmark mitt um að slefa undir 6 tímana ekki nást, því skrefin voru þung. Ég missti hvern hlauparann á fætur öðrum fram úr mér og ég var farinn að sætta mig við plan B, sem var að fara undir 6:30 og hafa gaman af þessu. Við Bláfjallakvíslina stoppaði ég, setti vindjakkann minn í töskuna mína og skipti um drykkjarbrúsa. Ég hafði bara etið hálfa orkustöng fram að þessu og var í góðu næringarástandi. Áfram hélt ég og enn var ég að missa menn framúr mér, þar á meðal Ásgeir Elíasson Bibbukall sem var föngulegur í appelsínugula bolnum sínum. Nú tók við erfiðasti hluti leiðarinnar. Það byrjaði að rigna fljótlega eftir að ég beygði út af veginum og kaldur vindur blés í fangið. Mér fannst þetta þó eiginlega betra en verra, því þetta frískaði mig upp. Sandurinn er lúmskt erfiður að hlaupa í og þegar þarna var komið við sögu var ég orðinn mjög þreyttur í fótunum. Tempóið á hlaupunum var í kring um 6 mín/km, talsvert hægar en ég hafði gert mér vonir um (5 min/km var meira í takt við mínar væntingar). Á leiðinni mætti ég ferðamönnum, sem undantekningalítið hvöttu mig áfram. Það varð meira virði eftir því sem á leið. Við fallegan læk hitti ég fyrir fornvin minn Halldór Lárusson, sem var á göngu ásamt fleira fólki. Urðu þar stuttir fagnaðarfundir og hélt ég áfram undir dynjandi hvatningarhrópum. Áfram var haldið eftir söndunum og niður brekkuna í Botna á ágætis dampi (ég hleypti engum fram úr mér þar !!).

Emstrur - Húsadalur (2:06:28):
Í Botnum náði Lárus mér og hlupum við samsíða um það bil kílómetra. Hann var þá kominn 5 mínútum á undan mér, því hann var í næsta ráshóp á eftir mér. Lárus var nokkuð léttur á fæti og þar kom að leiðir skildu. Brekkan niður að Emstru á var erfið og komst talsverð möl ofan í skóna mína. Þurfti ég því að staldra við og tæma skóna áður en haldið var yfir brúna. Þegar hér var komið við sögu leið mér þokkalega, en var enn þungur á mér. Ég var alveg laus við krampa og meltingartruflanir. Það eina sem amaði að mér voru þungir fætur, sem greinilega voru ekki alveg nógu vel undirbúnir undir þessa áreynslu. Verkirnir voru heldur skárri og ég var orðinn nokkuð viss um að slefa þetta undir 6:30.
Við Ljósánna tóku hressir starfsmenn á móti mér og fékk ég mér Bounty bita og kók í tilefni þess. Þar var mér sagt að einungis 5 kílómetrar væru eftir, en ég hafði gizkað á 6 til 7. Ég sá því að líklega færi ég undir 6:20 ef ég dæi ekki á Kápunni. Við rætur Kápunnar hitti ég fyrir hlaupara sem var á síðustu bensíndropunum. Ég laumaðist í neyðarbirgðir mínar (heimalagaður orkubiti) og bauð honum. "Ég er ekki í aðstöðu til að neita neinu" sagði þessi ágæti maður um leið og hann tók við lífsbjörginni. Á þessum lokakafla fann ég óvænt að átti nóg eftir og gekk rösklega upp Kápuna og fór eins hratt og ég þorði niður hana. Eftir að yfir Þröngánna var komið setti ég í annan gír og hljóp upp brekkuna og blastaði svo niður stíginn að Húsadal eins og druslan dró. Síðustu 100 metrarnir voru teknir á spretthlaupstempói, því ég sá að ég átti möguleika á að fara undir 6:15. Það tókst þó ekki, því lokatíminn var 6:15:05. Móttökurnar í markinu voru mjög góðar, starfsmenn boðnir og búnir til að hlú að örþreyttum og skjögrandi þátttakendum.

Húsadalur - Garðabær
Ég var mjög sáttur við frammistöðuna þegar í mark var komið. Sérstaklega með að ég hafi átt nóg inni. Líklega hef ég átt innstæðu fyrir tíma á bilinu 6:05 - 6:10, en varla undir það. Það er þó erfitt að dæma um það, því ég fór of bratt af stað. Það eru fullt af ef-um sem aldrei verður svarað.
Stemmingin í Húsadal var með eindæmum góð og einhvernveginn fannst mér eins og allir væru sigurvegarar þar með talinn undirritaður. Ég hitti Lárus í karlatjaldinu og var hann súrsáttur við sitt hlutskipti. Tíminn rétt slefaði yfir 6 tímana. 10 sekúntum betri tími og hann hefði verið sætsáttur ;) Eftir sturtu og "heita" pottinn sem reyndar var hlandvolgur settumst við niður í grilltjaldinu og fengum okkur ljúffengar lambasneiðar með tilheyrandi jukki. Við Lárus sátum á borði með heiðurshjónunum Erni og Báru og ofurhlauparanum Gunnlaugi, sem er laundrjúgur yfir afrekum sínum (og hefur efni á því). Fyrsta rúta heim og áttum við Lárus gott spjall saman á leiðinni heim. Gerðum upp hlaupið og rifjuðum upp valin atriði úr Nætur- og Dagvaktinni. Þegar heim var komið var tekið á móti hinum 45 ára 363 daga gamla húsbónda með kostum og kynjum. Góður endir á góðum degi.

Uppgjör
Framkvæmd hlaupsins var á heimsmælikvarða, stemmingin og þjónustulund starfsmanna var með eindæmum góð. Gögnin sem við fengum í hendur voru frábær og öll aðstaða á marksvæði til fyrirmyndar. Viðmót almennra ferðamanna var síðan til að kóróna upplifunina.
Eftir á að hyggja held ég að ég hafi átt inni c.a. 10 mínútur en varla mikið meira en það. Um það er þó ómögulegt að segja ef ég hefði farið mér hægar upp að skeri. Ég hef það á tilfinningunni að ég geti tiltölulega auðveldlega komist niður á 5:30 - 5:40, en þá þarf ég að bæta nokkra hluti eins og t.d. hlaup upp og niður brattar brekkur og bæta styrktaræfingum í æfingaprógrammið og síðast en ekki síst að bæta gæði og magn hlaupaæfinga.

Debut

2009-07-22T22:14:00.006Z

Laugardaginn 6. júní síðastliðinn þreytti ég frumraun mína í maraþon hlaupi. Ákvörðunin var tekin í lok apríl, þannig að ekki var langur tími til skipulegs undirbúnings. Ég hugsaði hlaupið meira sem æfingu fyrir laugavegshlaupið en einhvern sperring við að ná topp tíma. Veturinn hafði verið afspyrnuslakur og ég því ekki í góðu formi. Undirbúningur hófst í viku 17, en hlaupið var þreytt í viku 23 og spannaði því aðeins 7 vikur. Markmiðið var að hlaupa skynsamlega og halda mér meiðslalausum. Hvort tveggja heppnaðist svosem þokkalega, en eftir á að hyggja hefði kannski átt að hlaupa oftar í viku. Æfingaálag vikanna var sem hér segir:

vika - fjöldi æfinga / km heild / lengsta hlaup / athugasemd
17: 3 / 31 / 20
18: 3 / 38 / 20
19: 2 / 23 / 12
20: 2 / 25 / 17
21: 2 / 50 / 32 / langa hlaupið var mjög erfitt og lenti ég á vegg eftir 25 kílómetra
22: 2 / 48 / 35 / langa hlaupið mjög þægilegt
23: 3 / 42,2 / 69

Það voru því ekki nema tvö löng hlaup í undirbúningnum, og mánudaginn fyrir hlaupið tók ég fulla Yasso æfingu niðri í Kaplakrika. Það var með vilja gert því maraþonið átti jú að vera æfing frekar en keppni.
Laugardagurinn rann upp bjartur og fagur. Hiti um 15 stig sól og hæg norðanátt. Hlaupið var haldið inni í 100 kílómetra hlaupinu sem fram fór inni í Fossvogsdal og Grafarvogi. Brautin er tvær 5 kílómetra slaufur og hljóp ég því ríflega 4 slaufur. Planið var að hlaupa þetta á 3:40 og lagði ég af stað á tæplega 5 min/km tempói (c.a. 3:30 heildartími), því ég átti von á að gott væri að eiga innstæðu fyrir hraðaminnkun á síðari stigum. Drykkjarstöðvar voru á 2,5 kílómetra millibili og ákvað ég að stoppa c.a. 10 sekúntur á hverri stöð og gefa mér góðan tíma til drykkju. Þetta gekk vel fyrstu 25 kílómetrana, en þá fann ég að þreytan væri farin að segja til sín, ég hægði því aðeins á mér, en hélt ágætis dampi. Loka tíminn var 3:37:45 sem ég er mjög sáttur við. Ég var aldrei nálægt þessum vegg sem margir lenda á og var fljótur að jafna mig á hlaupinu og mætti á æfingu á þriðjudeginum lítið þreyttur - æfingin heppnaðist því fullkomlega. Ég stefni á að bæta tíma minn verulega í næsta maraþon hlaupi og þá verð ég vonandi lengur að jafna mig ;)

Langt síðan síðast....

2009-07-22T10:39:00.004Z

Það er liðinn langur tími síðan ég síðast skrifaði eitthvað hér. Ástæðan er fyrst og fremst sú að ég skrái nú allar æfingar á hlaup.com (þeirri frábæru síðu). Ég ætla að reyna að summera upp síðasta ár í þessari færslu og nota það svo til að skrifa um þau keppnishlaup sem ég fer í og tel þess virði að skrásetja.

Sumarið 2008 var laklegt hlaupasumar (en mjög gott að öðru leyti). Ég var latur í júlí og meiddist smávegis á fæti í ágúst, nóg til að komast ekki í Reykjavíkurmaraþonið. Bankarnir hrundu yfir þjóðina og þá tóku við erfiðar vikur og mánuðir fyrir okkur sem vinnum í banka (sem og aðra) og hljóp ég lítið sem ekkert fram að áramótum.

Ég ákvað að taka þátt í gamlárshlaupi ÍR og náði furðanlega góðum tíma 43:21 sem ég var mjög sáttur við miðað við það sem á undan var gengið. Tók líka powerade hlaup 8. janúar á 44:03.

Ég byrjaði aftur að hlaupa reglulega í janúar, svona 2-3 í viku. Það var mikið vinnuálag á mér fyrstu þrjá mánuði ársins og var stundum erfitt að finna hentugan tíma til hlaupaiðkunar.

Það var svo ekki fyrr en í Apríl að ég fann hlaupagleðina aftur, minna að gera í vinnunni og sólin hærra á lofti. Ég gat að vísu ekki hlaupið í 2 vikur vegna smá meiðsla, en eftir sumardaginn fyrsta hef ég verið meiðslalaus og aukið æfingamagnið jafnt og þétt.

Í byrjun júní hljóp ég fyrsta maraþonið mitt og tók laugaveginn síðasta laugardag. Báðir þessir viðburðir verðskulda sér færslu.

Flugleiðahlaupið

2008-05-09T10:03:00.000Z

Mér hefur alltaf fundist orðið Flugleiðir vera fallegra en Icelandair. Icelandair er eflaust skynsamlegt nafn í markaðsstarfi erlendis, en afhverju að breyta því hérlendis ?

Nóg um það. Ég hljóp allavega þessa 7 kílómetra á 27:30 sem eru rúmum 20 sekúntum lakari árangur en í fyrra. Ég var illa fyrir kallaður, enda var ég að vinna fram yfir miðnætti kvöldið áður og fékk einungis 5 tíma svefn um nóttina. Ég fann það strax á öðrum kílómetra að þetta yrði streð. Ég sparaði mig því aðeins á 5. og 6. kílómetra til að eiga smá orku eftir fyrir endasprettinn, sem var hvortveggja í senn undan vindi og brekku.

Veður var frábært og ekki fékk ég útdráttarverðlaun frekar en fyrri daginn. Ég rifjaði það upp að ég fékk einungis ein útdráttarverðlaun í uppskeruhátíð Powerade fyrir ári síðan, þrátt fyrir að hafa tekið þátt í öllum hlaupunum. Ég held að mitt nafn hafi eitt verið eftir í pottinum þegar ég loksins fékk forláta geisladiskaspilarahaldara fyrir hlaupabelti. Mjög praktískt og mikið notað ... eða þannig.

Hérastubbur á 39:57

2008-05-01T17:17:00.005Z

Ég þreytti hérahlaup breiðabliks í dag og skreið undir 40 mínúturnar. Það er tæpri mínútu betri tími en á sama tíma fyrir ári, en þá hljóp ég Fjölnishlaupið á 40:49. Það gefur mér góðar vonir um að hlaupa Icelandair hlaupið niður á 26 mínútur að viku liðinni. Ég er svona einum mánuði betri en í fyrra, því ég hljóp heilsuhlaup Laugaskokks á 39:59 sællar minningar fyrir réttum 11 mánuðum síðan.

Nú þarf ég að taka rólegu hlaupin rólegar og lengra og tempó hlaupin hraðar.

Árni sonur minn og Ásgeir vinur hans tóku 5 kílómetrana í nefið. Ásgeir á 23:56 og Árni á 24:30. Nokkuð vel af sér vikið hjá 8 ára guttum.

Enginn er verri þótt hann svitni.

2008-04-17T09:23:00.003Z

Skrapp í Ásgarð í gærmorgun. Hitaði upp 4 km og tók svo 18 mínúta pýramídaprógramm á level 9. Ég var frekar þreyttur og kraftlaus - ekki veit ég eftir hvað, en kláraði þetta samt. Endaði svo á 5 km á 5 mínútna tempói.

Bretti á sunnudegi

2008-04-14T09:23:00.002Z

Ég tók þægilega á því í Ásgarði í gær. 11 kílómetrar á brettinu, sem inniélt 9 mínútna brekkuprógram, 30 mínútna fartlek og upphitun/niðurskokk. Ég fann ekki mikið fyrir eftirköstum Flóahlaupsins, enda stillti ég álaginu í hóf.

Fjör í flóanum

2008-04-12T21:10:00.003Z

Ég ásamt Árna 8 ára syni mínum og Frosta vini hans og sálufélaga tókum þátt í Flóahlaupi Samhygðar í dag. Við vorum seinir fyrir og mættum ekki á staðinn fyrr en 5 mínútum fyrir hlaup. Ég hljóp því án upphitunar. Ég byrjaði bratt að venju á 3:42 en það dró fljótlega af mér og lullaði ég restina á c.a. 4:08 tempói. Síðasta kílómetrann hljóp ég á 3:48. Tíminn endaði í 40:22. Piltarnir stóðu sig eins og hetjur og hlupu kílómetrana 3 á 14:30. Veður var yndislegt og ég er sáttur við árangurinn. Nú er bara að skrölta undir 40 í næsta hlaupi. Eftir kaffihlaðborð var haldið í sund á Selfossi og átti ég þar notalegt pottspjall við aðra hlaupara. Nú er ég búinn að graðga í mig lambalæri. Frábær endir á góðum degi.

Rólegur æsingur

2008-04-10T21:45:00.002Z

Tók 6x400 niðri í Kaplakrika. Fór þá á hóflegum hraða (1:28, 1:21; 1:20; 1:21; 1:20; 1:26) þar sem ég er að gæla við að fara austur fyrir fjall og taka þátt í Flóahlaupinu. Þar verður ekki stefnt á neinn sérstakan tíma heldur á góða tempóæfingu. Mér skilst að þar sé boðið upp á kaffihlaðborð og bíð ég spenntur eftir því.

Rólegheit

2008-04-10T09:13:00.002Z

Þriðjudagshlaupið var mjög rólegt og þægilegt 10,5 km á klukkutíma. Mér leið mun betur en á Sunnudaginn var. Vinstri fóturinn er enn að stríða mér án þess að ég sé almennilega meiddur. Þetta finnst mér bagalegt, því ósjálfrátt hef ég tilhneygingu til að hlífa mér.... kannski er þetta merki um að skynsemin aukist með aldrinum.

Loksins loksins

2008-04-07T09:53:00.004Z

Kári Steinn Karlsson bætti 32 ára gamalt met fyrrum nágranna míns Sigfúsar Jónssonar um rúmar 40 sekúntur nú um helgina. Þar með er næst lífseigasta íslandsmet í einstaklingsgreinum frjálsra íþrótta. Glæsilegur árangur hjá góðum dreng. Nú fara íslandsmetin í lengri hlaupunum að hríðfalla.

Ég hljóp ekkert út á laugardaginn, en tók stutta 10,5 kílómetra létttempóæfingu í gær. Byrjaði fyrstu 4 á 5:00 tempói, tók næstu 5 á vaxandi hraða 4:40 - 4:15 og síðusu 1,5 kílómetra á 5:00.
Ég var hálf þreyttur og gersamlega stemmingslaus.

Rokur

2008-04-03T21:36:00.002Z

Garðabæjarhópurinn fjölmennti á rykkjaæfingu. Samtals voru teknir 10 rykkir, reyndar bættum við Grétar við einum undir lokin, þannig að þeir urðu 11 alls. Vegalengd á bilinu 100 - 500 metrar á að gizka, og tempóið mismunandi eftir því hvort farið var upp eða niður og með eða á móti vindi. Nú er ég lúinn....10,5 kílómetrar í höfn

Skapið er að skána

2008-04-02T11:03:00.007Z

Ég tók mér góða hvíld á Sunnudag og Mánuda og sleikti sárin. Ég hef ákveðið að líta jákvæðum augum á aulaskapinn í mér á laugardaginn og líta svo á að ég hafi grætt einn kílómetra !!

Í gær mætti ég í hlaupahópinn og þar var farið rólega og yfirvegað 11 kílómetra á 5:10 tempói að jafnaði. Þægilegt hlaup og góður félagsskapur. Ég hjólaði í vinnuna í morgun og síðan heim á eftir. Ætli það losi ekki 20 kílómetra.
Nú fer ég að hlaupa meira útivið með hækkandi hita og sól. Næstu tvo mánuðu stefni ég á að hlaupa eins mörg götuhlaup og ég get. Þau hlaup sem ég stefni á eru:

12.04.2008 - Flóahlaup UMF Samhygðar
24.04.2008 - Víðavangshlaup ÍR
01.05.2008 - 1. maíhlaup Fjölnis og Olís
08.05.2008 - Icelandair hlaupið
17.05.2008 - Neshlaup TKS
29.05.2008 - Heilsuhlaup Laugaskokks og Landsbankans
07.06.2008 - Húsasmiðjuhlaupið

Þetta gera 7 hlaup á 9 vikum og ég geri ráð fyrir að ná allavega að hlaupa 5 af þessum hlaupum.
Draumurinn er að hlaupa 10 km undir 39 mín, 5 km undir 18:30 og icelandair hlaupið undir 26. Hvort hann rætist kemur í ljós síðar.

Hrakfarir....

2008-03-29T18:31:00.003Z

Mér er tregt um tungu í dag.

Ég fór hálfa maraþonið á 1:35:15 og er hundsvekktur, ég get þó huggað við mig það að ég hef tapað á að giska 3-4 mínútum þegar ég ásamt Gunnari Páli Jóakimssyni villtist við Nauthól á bakaleiðinni. Við fundum ekki réttu leiðina inn á loftleiðalykkjuna fyrr en eftir japl jaml og fuður. Þarna brást framkvæmd hlaupsins að mínu mati, þar sem þarna eru talsverðar framkvæmdir og ekki alveg augljóst fyrir ókunnuga hvar á að beygja út af göngustígnum. Það hefði verið gott að hafa þarna einn brautarvörð.

Veðrið var ágætt, en frekar kalt og vindasamt á smá kafla. Hlaupið gekk nokkurnvegin eftir áætlun fyrstu 10 kílómetrarnir voru á 42:00 eða 4:12 tempói. Heldur fór að draga af mér seinni hluta hlaupsins, en ég hélt þó þokkalegu tempói. Ég dró uppi Gunnar Pál þegar 7,5 kílómetrar voru eftir, eða rétt áður en við komum að þessari fyrrgreindu beygju inn á lykkjuna. Ég var orðinn mjög stífur og sýrður í lærum og hljóp því síðustu 7 kílómetrana meira af vilja en mætti, enda hlaupagleðin fokin út í veður og vind. Ég hafði þó af að taka endasprett síðustu 150 metrana.

Ég geri ekki ráð fyrir að hafa náð undir 1:30 í eðlilegu hlaupi, en örugglega undir 1:32. Ég er því þokkalega sáttur samkvæmt ánægjustikunni.

Þetta er met vika í kílómetum talið, 58 kílómetrar í húsi.

5k á saltketshraða

2008-03-27T10:16:00.000Z

Ég vaknaði af sjálfsdáðum kl 6 í morgun og fór rólega 5 kílómetra í ræktinni á hraðanum 5:30. Púlsinn var á bilin 140 - 145, þannig að þetta var frekar þægilegt. Nú hvílist ég vel fram að hálfþoni.

Blöðrur á þriðjudegi

2008-03-25T23:47:00.006Z

Ég skrapp niður í Ásgarð og hljóp samtals 10 kílómetra í tveimur lotum. Fyrri lotan var á 25 mínútum, byrjaði í 6:00 tempói og endaði í 4:34. Seinni lotuna tók ég 1. 3. og 5 á 5:00 tempói og 2. og 4. á 4:42. Ég var nokkuð sprækur miðað við æfingu gærdagsins, en fékk samt risastóra blöðru á vinstri stóru tá. Nú tek ég því rólega fram að helgi ... en þá er ég að spá í að spreyta mig á hálfu maraþoni. Ég hef enga tilfinningu fyrir hálfmaraþon forminu en ánægjuskalinn er eftirfarandi:

Meira en 1:35 - Svekktur og fer ekkert í felur með það
Minna en 1:35 - Svolítið súr, en ber mig mannalega
Minna en 1:33 - Sæmilega sáttur og ekki loku fyrir það skotið að ég brosi út í annað
Minna en 1:30 - Mjög sáttur
Minna en 1:26:56 - Verulega ánægður, enda bæting. Ég mun bjóða Gísla ritara upp á hákarl ef þetta gerist
Minna en 1:25 - Ég mun mæta í næsta sjósundtíma á miðvikudaginn eftir viku (og bjóða Gísla upp á hákarl)

Sukkjafnað á páskum

2008-03-24T18:14:00.010Z

Ég tók mér frí á Páskadag og naut þess að nýta hann með fjölskyldunni. Í morgunsárið bakaði ég brauðbollur og bræddi eitt páskaeggið, sem var falið inni í bakaraofninum í leiðinni. Allt bjargaðist þetta að lokun þar sem ég fórnaði páskaegginu mínu á altari sáttfýsinnar.

Í dag hætti ég mér hinsvegar í musteri líkamans, nefninlega í World Class í laugum. Þar var allt of mikið af fólki flestir líklega að sukkjafna vegna páskasteikanna. Mér líkar betur við WC í Hafnarfirði, nýrri tæki og færra fólk. Sjálfur hljóp ég alls 20 kílómetra á brettinu á samtals 93 mínútum, og tel ég þá að fullu sukkjafnað og ríflega það. Æfingin samanstóð af:

3 km upphitun á 5:00 tempói (15mín)
5 mínútna hvíld
10 km sportprógram á level 4 (síðustu 2 á level 2). Meðalpúls á að giska 175, sem er bísna hátt. (45mín)
1 km niðurskokk (5 mín)
5 mínútna hvíld
4,6 kílómetrar á þokkalegum hraða (20 mín)
1,4 km niðurskokk (8 mín)

Ég er þreyttur en ánægður eftir þetta. Ristin er til friðs, og tel ég það skýrt merki um að ég sé ekki slasaður. Við hjónin viðruðum hundinn og síðan var farið í bíó með tvö börn.

Rólegt og stutt

2008-03-23T02:23:00.002Z

Ég mætti í hlaupahópinn í fyrsta skipti í háa herrans tíð. Þar var fámennt en góðmennt. Ég var fann fyrir smáverk í ristinni þannig að ég hljóp einungis 9 kílómetra mjög rólega, eða á ríflega 50 mínútum. Seinni partinn fór fjölskyldan í Skálafell á skíði. Um kveldið ver etinn fylltur kjúklingur og kneifað kókið með.

Þessa vikuna voru hlaupnir 53 kílómetrar. Hvort sú næsta verður jafn umfangsmikil skal ósagt látið.

Logn og léttskýjað

2008-03-21T12:24:00.002Z

Í dag er dásamlegt veður, hiti í kring um frostmark, logn og léttskýjað. Ég hljóp í dag 10 kílómetra á frekar hröðu tempói 4:15. Þetta reyndist mér frekar létt og er ég bjartsýnn á góðan árangur í vor. Ætli 10 km keppnisformið hjá mér sé ekki komið undir 40 mínúturnar.

13 kílómetrar á einu bretti

2008-03-18T20:43:00.005Z

Tók góða brettaæfingu í morgun. Upphitun 2 km og síðan 10 km prógramm á hraða 4:30 og level 4 mestan part (lækkaði niður í 2 - 3 í c.a. 1,5 km). Endaði á einum kílómetra á þokkalegum hraða.

Tími: 45:00
Meðalpúls: 168
Hækkun: 120 m
Brennsla: 795 kkal

Formið er á uppleið, enda uppsker maður eins og sáð er....

Nú er ég kominn með 34 kílómetra frá því á sunnudag.

Langt og hratt

2008-03-17T13:08:00.002Z

Ég er farinn að hlaupa úti og finn að hlaupaformið er allt að koma til.

Á föstudaginn fór ég með vinnufélögum mínum í 8,5 kílómetra hádegisskokk. Það var farið rólega yfir eða á 50 mínútum rétt tæpra 6 min/km. Þetta var afar þægileg og svitalaust að mestu.

Í gær (sunnudag), hljóp ég í blíðskaparveðri út á Álftanes. Kílómetrarnir 15 voru farnir á 67:15 sem gerir meðaltempó upp á 4:29. Mér leið vel og fann engin eymsli af neinu tagi. Ég var reyndar frekar þreyttur seinna um daginn, en það skrifast að hluta til á það að ég var að vinna aðfaranótt laugardags.

Í morgun tók ég tækin í World Class með áherslu á fætur. Ég er í þokkalegu ástandi þar. Upphitun var 3 km á skíðavél og eftir lyftingarnar hljóp ég 2 km á 3:45 tempói og 1 km á 12. Samtals 6 km í dag....

Hvað morgundagurinn ber í skauti sér veit ég ekki, en stefnan er tekin á 10 kílómetra sport prógramm á level 4, hraða 13,3 km/klst (4:30).

Þetta er allt að koma

2008-03-12T13:51:00.003Z

Á Sunnudaginn tók ég létta pýramídaæfingu í Ásgarði, þ.e. á erfiðleikastigi 9 og kláraði það nokkuð þægilega (ef það er þægilegt að hlaupa í 14% halla á 8,6 km/klst). Samtals 8 km í hús

Í morgun vaknaði ég fyrir allar aldir og tók 10K prógramm á brettinu í World Class á erfiðleikastigi 2 og 4:30 hraða. Það var frekar létt fannst mér. 13 kílómetrar í dag.
Þetta er allt að koma.

Góð brettaæfing

2008-03-05T11:05:00.003Z

Ég fór snemma að sofa í gærkveldi, því ég hafði verið að vinna frameftir nóttina áður. Ég var því vaknaður fyrir klukkan 5 í "morgun". Tók góða brettaæfingu í ræktinni. Tíu mínútur í upphitun og 10 kílómetra á brekkuprógrammi samtals 12 km. Hraðinn var 4:30. Ég byrjaði á level 5, en sá fljótt að ég gæti ekki haldið þessum hraða. Ég ákvað að halda frekar tempóinu og lækkaði mig því niður í level 3 og svo 1. Niðurstaðan eftir þessa æfingu var:

Tími: 44:58
Meðalpúls: 173 bpm
Hækkun: 101 m

Ég svitnaði heil ósköp. Þessa æfingu ætla ég að gera vikulega, og reyna að halda þessum hraða á level 2.

Nú ætla ég að fara að hlaupa meira, og lyfta minna. Stefnan er tekin á 2 hlaupaæfingar á bretti, ein úti og ein á braut. Svo lyfti ég 1-2 í viku.

Ekki dauður enn...

2008-03-03T08:59:00.003Z

Ég hef verið bísna latur við þetta blogg síðan í September. Ástæðan er einföld, ég lennti í meiðslum og kom mér ekki almennilega í gang fyrr en um áramótin.
Ég strengdi mér það áramótaheit að fara fyrr að sofa á kvöldin, sem ég hef nokkurn vegin staðið við. Svo keypti ég mér þriggja mánaða kort í World Class og hef samviskusamlega mætt þangað þrisvar í viku. Mér leiðast lóðalyftingar og finn að þetta er að fara að verða gott. Ég þarf bara að þrauka 4 vikur í viðbót.

Ég ákvað að vera skynsamur og fara mér hægt í hlaupin. Byrjaði mjög rólega á bretti um miðjan janúar og hef smám saman aukið magnið. Ég fann fyrir smá þreytu í hné framan af, en er gersamlega einkennalaus í dag.

Ég tók svo þátt í tveimur innanhússmótum í febrúar og mars. Fyrst meistaramóti Íslands í öldungaflokki þar sem ég hljóp 60 metra á 8:58, sem ég er mjög sáttur við miðað við að ég kann ekkert á svona hlaup. Síðan hljóp ég 200 metra og 800 metra með 15 mínútna millibili. Tímarnir voru 28:49 og 2:40,42. Ég var nett sýrður í 800 metrunum eins og tíminn gefur til kynna. Ætli ég eigi ekki að geta hlaupið þetta á 2:25 eins og ástandið á mér er í dag. Daginn eftir fór ég 3000 metrana á 10:53,50. Ég er mjög sáttur við þann tíma miðað við ástundun undanfarinna vikna.

Á þriðjudaginn var plataði Steinn mig á brautina og tók ég 3x400, 1x200, 1x300, 5x200 og 1x800. Tímarnir á 200 voru um 34-36 sek, 300 á 52, 400 á 73-75 og 800 á 2:44. Mér leið nokkuð vel eftir þetta.

Nú um helgina tók ég svo þátt í NM öldunga innanhúss og hljóp 3000 metra á 10:48,17 og 1500 metra á 4:58,87. Ég fór allt of bratt í 3000 metrana og hef örugglega glatað þar 10 til 15 sekúntum. 1500 metrarnir voru teknir af meiri skynsemi eins og tímarnir gefa til kynna. Ég hlaut brons í báðum hlaupum.

Framtíðin er óviss, en ég stefni á að æfa betur á brautinni í framtíðinni og einbeita mér að 1500 - 10000 metrum.... og reyna að forðast meiðsli

Meiddur....

2007-09-24T14:04:00.000Z

Ég er búinn að vera meiddur í ristinni síðastliðnar 2 vikur. Það finnst mér ekki gaman.... ég ætla þó að reyna að byrja að skokka létt í þessari viku.

10000 / 39:05:45

2007-09-08T22:22:00.000Z

Ég sá það í blaði allra landsmanna fyrir tilviljun að Meistaramót Íslands í 5000 metra hlaupi kvenna og 10000 metra hlaupi karla færi fram í dag. Þar sem ég tek sjálfan mig ekki of hátíðlega ákvað ég að láta slag standa. Ég sleppti því laugardagsæfingu hlaupahópsins í dag. Ég hef reyndar skrópað nánast í allt sumar, þannig að ekki er ólíkleg búið sé afskrifa mig. Kannski verður slátrað alikálfi þegar týndi sonurinn mætir.

Þegar ég kom á Kópavogsvöll hitti ég þar fyrir Stein Jóhannsson, sem ætlaði að keppa þrátt fyrir óhagstætt veður. Það var nefninlega hellirigning og frískleg gola. Ég bar mig vel og sagði að mér þætti gaman að hlaupa í rigningu. Heldur var þáttakan dræm í kvennahlaupinu. Ein kona mætt, hver önnur en Eva Einarsdóttir. Hún vann náttúrulega hlaupið með glæsibrag á tímanum 19:52. Til hamingju með það, það er tímaspursmál hvenær hún mölvar 40 mínútna múrinn í 10 K.

Ég var aldursforseti í hlaupinu, sá eini í aldursflokknum 40 - 44 ára. Ég ákvað strax að hlaupa mitt hlaup óháð því hvað aðrir gerðu. Ég rak því lestina allt hlaupið, enda hefði ég sprungið á þriðja eða fjórða hring hefði ég reynt að fylgja ungviðinu eftir. Stefnan var tekin á að fara undir 39 mínútur. Metnaðarfullt markmið ef veður og slæleg ástundun er tekin með í reikninginn. Hraðinn var stilltur á 90 sekúntur á hring og hélt ég því í 2,5 kílómetra. Það slokknaði á hlaupaúrinu mínu eftir 1,5 km. En Björn Margeirsson var liðlegur í að öskra á mig tímana á tveggja kílómetra fresti. Þeir voru sem hér segir.

2 km - 7:30; 4 km - 15:20; 6 km - 23:17; 8 km - 31:13; 10 km - 39:06

Þetta var gaman þrátt fyrir að markmiðið næðist ekki.

New York, New York

2007-08-29T17:20:00.000Z

Við Björn fórum til New York í sex daga. Tilgangur ferðarinnar var þríþættur. Í fyrsta lagi að kaupa gítar fyrir Björn, í öðru lagi að skoða stórborgina og í þriðja en ekki síðasta lagi að fara á tónleika með uppáhalds tónlistarmanni okkar feðga. Sá heitir Phil Keaggy og spilar feykivel á gítar. Skiptir þá ekki máli hvort um er að ræða rafmagnaðan eða órafmagnaðan. Gítarinn sem Björn keypti er forláta Gibson Les Paul Studio, hvítur að lit, gott hljóðfæri sem þægilegt er að spila á og hljómar vel.

Í New York skoðuðum við m.a. American Museum of Natural History, Empire State bygginguna, NBC, Rockefeller Center, Frelsisstyttuna, Ellis Island, World Trade Center reitinn og Kínahverfið. Við fórum á söngleikinn Spamalot, sem er byggður á hugmyndum frá Monty Python hópnum. Það er skemmst frá því að segja að það var mjög skemmtilegt.

Á föstudeginum tókum við bílaleigubíl og keyrðum sem leið lá til Kingston í NY fylki. Þetta er smábær 100 kílómetra fyrir norðan New York borg, og var víst um tíma höfuðborg fylkisins árið 1777 (sú fyrsta). Tónleikarnir voru haldnir í lítilli kirkju og voru þeir tvískiptir. Í fyrri hluta þeirra stóð hann einn á svið með kassagítar að vopni. Phil notar mikið tækni sem kallast á ensku looping, sem byggist á því að hann tekur upp stef og byggir síðan ofan á það öðrum stefum. Þannig getur hann verið eins manns hljómsveit. Eftir hlé stigu á stokk bassaleikarinn Toni Levin og trymbillinn Jerry Marcotta. Þeir félagar eru ef til vill frægastir fyrir að spila reglulega með Peter Gabriel, og spiluðu þeir meðal annars á því víðfræga lagi Sledge Hammer.
Phil bað náðarsamlegast um að fá að spila á nýja gítarinn hans Björns. og varð hann góðfúslega við þeirri bón, það var ekki leiðinlegt og fékk gítarinn góða dóma hjá meistaranum.

Hvað varðar hlaupaiðkun, þá var hún hófleg. Ég reimaði fjórum sinnum á mig skóna. Fyrsta skiptið fórum við Björn saman upp í Central Park, Björn fékk einhver eymsli í hné, þannig að skokkið var styttra en til stóð. Í Kingston tók ég hraða 6 kílómetra. Að lokum hljóp ég 9,7 km hring í Central park tvisvar sinnum. Fyrra skiptið í 30 stiga hita og seinna skiptið í 20 stigum. Seinna skiptið var mun þægilegra en hið fyrra. Tempóið var þokkalegt eða c.a. 4:10-4:15 min/km.

Sumarið er tíminn...

2007-08-29T16:54:00.000Z

Ég hef ekki fundið hjá mér þörf fyrir að blogga síðasta mánuðinn. Þessi mánuður hefuð þó síður en svo verið tíðindalítill. Ég hef hlaupið minna en vonir stóðu til, en hef þó náð að taka 2 æfingar á viku.

Við fjölskyldan gerðum víðreist í fríinu. Fimm nætur að Hólum í Hjaltadal, skoðuðum þar meðal annars Síldarminjasafnið, Vesturfarasetrið, Hólastað, Skagann, Kántríbæ og gengum upp í Gvendarskál svo eitthvað sé tínt til. Þarna náði ég 2 snörpum sprettum

Eftir þetta fórum við suður Kjöl í Kirkjulækjarkot þar sem við vorum 4 nætur í góðu yfirlæti. Frekar lítið hlaupið, en náði þó að sperra mig einu sinni hraða 8 kílómetra.

Leiðin lá svo í Skaftafell 3 nætur, einn sprettur þar upp að Svínafellsjökli og til baka 13 kílómetrar söfnuðust þar í sarpinn. Í Skaftafelli skoðuðum við Svartafoss og bræður hans, gengum áleiðis inn í Morsárdal og sandinn til baka.

Veðurspáin var ótrygg, en við ákváðum samt að skella okkur á Höfn, þar sem við undum tvær nætur og jafn marga daga. Ég tók 5 yassóa á nýju tartaninu, en unglingalandsmótið var haldið þarna helgina áður. Á Höfn hittum við fyrir vinnufélaga minn hann Jón Garðar, og áttum við saman notalega kvöldstund í pallhýsinu hans.

Heim var haldið þar sem veðurspáin var frekar köld og blaut á NA landi. Heima var veður frábært og náðum við að þvo þvotta og mála einn skjólvegg áður en við héldum norður heiðar í brúðkaup Páls og Ingibjargar. Páll þessi er bróðir Guðfinnu. Einn 21 kílómetra heiðmerkurtúr .

Til Akureyrar var haldið á miðvikudagsmorgni, Guðfinna fór í skólann meðan við hin í fjölskyldunni undum okkur við aðra hluti. Ég náði að jogga 16 kílómetra hring vítt og breitt um sunnanverðan Akureyrarbæ. Það hafði góð áhrif á matarlistina mína. Á fimmtudegi héldum við sem ekki lærðum til berja í Hörgárdal, þar voru væn ber sem voru etin með stæl um kvöldið.

Að öðru leyti var ekki hlaupið fyrir norðan, en til gamans má geta að brúðkaupið tókst með eindæmum vel og voru allir sjálfum sér til sóma, jafnt brúðhjón sem aðrir veislugestir.

Á mánudag hljóp ég heim úr vinnu og hjólaði sömu leið í vinnu daginn eftir.

Hjólað og hlaupið en ekkert synt.

2007-07-26T20:09:00.000Z

Ég hjólaði í og úr vinnu samtals 18 kílómetra. Endaði svo daginn með 7 yassó sprettum. Þeir voru farnir á 2:56 - 3:00 fyrir utan sá síðasti sem var á 2:45. Ég lagði hann upp þannig að fyrstu 400 metrana hljóp ég hratt og sá svo til hvað ég dugði. Ég dugði ágætlega og hljóp þessa 800 metra á jöfnu splitti. Það sat í mér þreyta eftir gærdaginn og hjólið. Mér fannst ég alltaf vera á mörkunum að fá krampa í vinstra lærið, en það slapp til. Ég er að falla úr hor, því vogin sýndi 66,2 kíló eftir kvöldmatinn. Nú tekur við sumarfrí hér innanlands. Ég ætla að reyna að vera duglegur í því...

Sama sullið

2007-07-26T10:00:00.000Z

Ég skokkaði heim í gær eftir langan vinnudag. Þetta gerði ég á þessum venjulega tíma, þ.e. súmum 38 mínútum. Nú er sumarfríið að fara að bresta á og vonandi næ ég að stunda hlaupin af meiri alúð en upp á síðkastið. Viktin er komin niður í 66 - 67 kíló sem eru góðar fréttir. Nú læt ég staðar numið í léttingum og reyni að halda þessari þyngd fram á haustið.

Heiðmörkin heimsótt

2007-07-23T00:16:00.000Z

Ég svaf yfir mig í gærmorgun og fór því ekki í hlaupahópinn. Í kvöld fór ég hinsvegar upp í heiðmörk í mildu veðri. Ég ákvað að fara í síðbuxum og jakka, það reyndist þjóðráð því það kom hressileg skúr á miðri leið. Hraðinn var vaxandi og líðanin ágæt, fyrir utan að ég fékk einhverja þreytuverki í hné þegar 3 kílómetrar voru eftir. Kílómetrarnir 16 voru farnir á 75 mínútum.

44 - 16081

2007-07-20T11:03:00.000Z

Í dag hefur jörðin farið 44 hringi í kring um sólina og snúist 16081 hring í kring um sjálfa sig síðan ég leit dagsins ljós. Ég á semsagt afmæli í dag. Ég vaknaði í morgun við afmælissöng, og ég verð að segja að þar fer fallegasti kór heimsins. Á degi sem þessum staldra ég gjarnan við og hugleiði líf mitt, fortíð og framtíð. Ég er gæfumaður í lífinu og finnst ég vera ríkasti maður á jarðríki eigandi 3 heilbrigð og vel gerð börn og frábæra eiginkonu. Ég ætla ekki að fara með nánari útlistanir á því, en læt nægja að segja að þeir sem halda því fram að þeirra eigin börn séu fallegust og best hafa því miður rangt fyrir sér því auðvitað eru það mín börn ;)

Í gærkveldi hljóp ég mitt síðasta hlaup .... 43 ára, ég ákvað að fara niður í Kaplakrika og taka eitt 3 kílómetra test. Þegar þangað var komið var einhver fótboltaleikur í gangi og þurfti ég að bíða í 20 mínútur eftir að komast á tartanið. Það var í lagi þar sem hlýtt var í veðri og gaman að horfa á unga fríska menn eigast við á knattspyrnuvellinum. Ég fékk að sjá þrjú mörk, þar af eitt víti og meira að segja einn brottrekstur á síðustu sekúndu leiksins, en þá höfðu Haukar skallað boltann í netið hjá ÍH mönnum við lítinn fögnuð markmanns þeirra. Það endaði með því að sá þurfti að yfirgefa völlinn.

Þegar leikmennhöfðu yfirgefið völlinn læddist ég á völlinn og tók mín 3 kílómetra á vaxtandi tempói eða 3:42, 3:40; 3:35 samtals 10:57. Þetta er ágætt miðað við stopula ástundun. Hún horfir vonandi til betri vegar núna í framhaldinu.

Sveitin mín

2007-07-16T10:24:00.000Z

Þetta var róleg helgi hjá mér. Við fjölskyldan vorum í Hlíðardalsskóla á móti hjá fríkirkjunni Veginum. Veður var frábært og stemmingin góð. Ég komst aðeins út að hlaupa á laugardeginum, en þá tölti ég 12 kílómetra á mjög rólegu tempói. Ég gerði þau mistök að taka tíkina með mér og heitt malbikið fór illa í þófana á henni, en það grær áður en hún giftir sig.
Á sunnudeginum fórum við lengri leiðina heim og heimsóttum sveitina mína. Sveitin mín er nánar tiltekið að Kolsholti í Flóahreppi (áður Villingaholtshreppi). Þar býr föðursystir mín og var ég þar í sveit á sumrin sem barn og unglingur. Það má segja að þar hafi ég verið alinn upp að hluta. Börn í dag fara á mis við þessa lífsreynslu og er það miður. Við fengum að sjá nýfædda kettlinga, heimalninga og náttúrulega beljur. Góð helgi að baki og vinnuvikan framundan.

Síðasta vika var þokkaleg hlaupavika 31 kílómetri.

Grænn kostur

2007-07-12T13:34:00.000Z

Ég hljóp heim úr vinnu í gærkveldi. Þetta er ferðamáti sem er í senn umhverfisvænn, heilsubætandi, ódýr og skemmtilegur. Það er ekki hægt að biðja um mikið meira .... jú ég hljóp þetta á 38 mínútum sléttum, sem ég held að sé besti tími minn á þessari leið. Það er gott því ég hef hlaupið að mikilli ákefð annan hvern dag síðan á Laugardag, og ég fór full seint að sofa nóttina áður. Ég á það nefninlega til að drolla frameftir, sérstaklega ef ég hef verið að vinna fyrr um kvöldið, ég glamra þá gjarnan á gítarinn minn - betri slökun er vandfundin. Það er við engan annan að sakast nema sjálfan mig í þeim efnum.
Ég kláraði fyrri umferðina á vegginn í gærkvöldi og ætla að klára dæmið í kvöld.

Þetta er allt að koma...

2007-07-10T14:02:00.001Z

Í gær hljóp ég heim úr vinnu á 38:15. Ég var með sprækasta móti, því þessi leið er nokkuð strembin, tvær langar og brattar brekkur í boði hússins, ég hitti þau Grétar, Ingu og Hörpu í Löngufitinni á leið niður að laug. Ég á ekki von á að komast mikið í hlaupahópinn það sem eftir lifir sumars, þar sem ég mæti yfirleitt ekki í vinnu fyrr en rúmlega 9, og þarf því að fara heim seinna en vant er. Kvöldið fór í að skafa málningu af gluggum. Við hjónin erum búin að ákveða endanlega lit á veggnum umhverfis húsið. Þannig að mér er ekkert að vanbúnaði að bretta upp ermar og klára þetta.

Landsmótshlaupið - 39:07

2007-07-07T13:20:00.000Z

Ég hef verið skelfilega latur við að hlaupa síðustu tvær vikur. Einungis skrölt 9 mílómetra á saltkjötshraða. Ég gerði mér því hóflegar vonir um glæstan árangur í dag. Það ótrúlega gerðist hinsvega að ég náði besta tíma mínum í ár, eða 39:07, sem er bæting um 8 sekúntur frá Húsasmiðjuhlaupinu. Aðstæður voru frekar erfiðari í dag en þá, þannig að ég er verulega sáttur. Ég límdi mig á Þórólf, Ingólf, Ívar Adolfs fyrstu 5 kílómetrana og var furðu hress. Millitíminn eftir 5 kílómetra var 19:28 og mér leið þokkalega. Eftir 7 kílómetra var tíminn 27:07. Síðustu þrír kílómetrarnir voru erfiðir, enda slælegar æfingar undanfarið farnar að koma í bakið á mér. Ég hélt þó haus og kláraði þetta með sóma. Var talsvert á eftir Ingólfi og Ívari og vel á undan Þórólfi (sem er árangur útaf fyrir sig).

Maður hét Björn og var Pétursson...

2007-07-04T13:20:00.000Z

Ég hef lítið hlaupið síðan 22. júní. Ástæðan er sú að síðustu tvær helgar hef ég verið upptekinn við annað, fyrst var skagamótið í knattspyrnu 7. flokks drengja og síðasta vika og nýliðin helgi var undirlögð af ættarmóti sem ég tók þátt í að skipuleggja ég skrölti þó 9 kílómetra á mánudaginn og var frekar lúpulegur.

Ættarmótið var haldið á Lýsuhóli í Staðarsveit og tókst með eindæmum vel. Þegar saman kemur frábært fólk í frábæru veðri og borða saman hvítlauks- rósmarínkryddað holulamb getur útkoman ekki verið annað en góð.

Ég frétti það um helgina að ég er víst þess vafasama heiðurs aðnjótandi að vera afkomandi Björns Péturssonar bónda að Öxl í Breiðuvík á Snæfellsnesi og konu hans Þórdísar Ólafsdóttur. Björn þessi er alræmdasta fjöldamorðingja íslandssögunnar og gegnir nafninu Axlar Björn. Hann var hengdur árið 1595 fyrir níu morð, en samsekri konu hans var þyrmt vegna þess að hún var kona eigi einsömul. Sonur þeirra Sveinn "skotti" reyndist einnig vera ógæfumaður og var hengdur hálfri öld seinna eða 1648. Hann eignaðist tvo syni, Gísla "hrók" og Halldór. Gísli fetaði í fótspor forfeðra sinna og endaði í gálganum. Áður en það gerðist eignaðist hann soninn Magnús, sem varð þeirra gæfu aðnjótandi að eignast ekki börn. Halldór komst hinsvegar ágætlega til manns og gerðist ærlegur bóndi í Eyjafirði og eignaðist heilbrigð börn að því best er vitað. Af honum er ég kominn ásamt 20000 öðrum íslendingum.

Meðal afkomenda Halldórs (og forfeðra minna) eru þeir Eiríkur Hallgrímsson (1773 -1843) og sonur hans Guðlaugur Eiríksson (1807 - 1895) sem voru annáluð hreystimenni. Bjuggu þeir á Steinkirkju í Fnjóskadal. Um Guðlaug var sagt að hann hafi verið "hið mesta hraustmenni og æru prýddur heiðursmaður". Guðlaugur þessi var langafi afa míns Aðalsteins Eiríkssonar, sem var að minnsta kosti "æru prýddur heiðursmaður" ef ekki hið fyrra líka.

Allur að koma til

2007-06-22T00:18:00.000Z

Í dag var Yasso dagur. Veður með eindæmum gott, hægur vestan andvari og 13 stig á mæli.
Tók 10 spretti og svo einn 400 metra í endann. Tímarnir talsvert betri en síðast allir á 2:51 eða 2:52 nema sá 9. var á 2:54 og 10 á 2:49. 400 metra spretturinn var farinn á 77 sekúntum, enda farið að draga af gamla manninum þegar hér var komið við sögu. Í fyrramálið skunda ég á skagann með yngsta soninn og horfi á hann iðka boltaspark. Mikil tillhlökkun á mínum bæ.

Skokkað heim....

2007-06-19T23:15:00.000Z

Veður er með besta móti þessa dagana til hlaupa og almennrar útivinnu, þ.e. stillt, hófleg sól og temmilegur hiti. Skokkaði heim úr vinnu á rétt rúmum 38 mínútum. Þar fyrir utan var stunduð garð- og málningarvinna. Framundan er Skagamótið í knattspyrnu, ég kemst því hvorki í Esjuhlaupið né Miðnæturhlaupið í ár. Í staðin verður skokkað á skaganum.
Í tilefni kvenréttindadagsins er rétt að óska konum til hamingju með daginn. Heldur fannst mér vera lítil stemming á Austurvelli þegar ég lagði af stað heim á leið. Hugsanlega voru þarna 50 - 70 manns (kvenns ??) með Kristínu Ástgeirsdóttur við gjallarhornið. Það vekur upp spurningar hvort jafnréttistbaráttan sé á einhverjum villigötum. Mín skoðun er ekki fastmótuð, en í mínum huga er jafnrétti það að allir fái sömu tækifæri óháð kyni, litarhafti eða trú. Á því eru þó augljósar undantekningar, t.d. kæmist ég seint í kvennakór, og heldur væri það ankannalegt ef múslími væri vígður prestur hinnar evangelísku lúthersku kirkju. Reynar grunar mig að þar innanborðs séu einhverjir trúleysingjar.

Gullpabbi Garðabæjar

2007-06-17T23:52:00.000Z

Þjóðhátíðardagurinn er í dag um land allt. Veður stillt og meinhægt, úrkomulaust og sólin glennti sig öðru hvoru. Ég fór með Árna og Önnu í hið árlega víðavangshlaup Garðabæjar. Reyndar er ekki hlaupið á víðavangi, heldur á fótboltavellinum. Hvað um það, við komum heim verðlaunum hlaðin. Árni varð þriðji í sínum flokki rétt á eftir nágrannavini sínum honum Ásgeiri. Anna fékk silfur í tíu ára flokknum og undirritaður hlaut gull í pabbaflokknum. Ég ber því nafnbótina Gullpabbi Garðabæjar þetta árið. Það þykir mér mikill heiður. Reyndar er það mér mikill heiður að vera faðir barnanna minna óháð íþróttaafrekum því þau eru talsvert í móðurættina.

Dagurinn var hefðbundinn, skrúðganga, lúðrasveit, fjallkona, hoppukastalar og kvenfélagskaffi. Við Björn kíktum á gospeltónleika í Hellisgerði seinnipartinn. Það var ágætis skemmtun, en rennslið hefði mátt vera betra. Strákarnir okkar sáu mér fyrir örlitlum hjartsláttartruflunum undir lok leiksins, en Serbarnir voru lagðir að velli með minnsta mun.

Heiðmörk í strekkingsvindi.

2007-06-16T14:23:00.000Z

Fór með Gísla, Gerði og Jóhanni upp í Heiðmörk. Samtals 23 kílómetrar í dag. Tempóið var frekar rólegt, enda er ég að reyna að temja mér skynsemi í löngu hlaupunum. Strekkings Suðaustanáttin var dásamleg. Þegar hlýtt er í veðri og farið er hægt er nefninlega ekkert að rokinu. Vikan gerði sig á 52 kílómetra sem er alveg þokkalegt.

Tíu og hálfur Yasso

2007-06-14T20:49:00.000Z

Ekkert var hlaupið á þriðjudag vegna slappleika. Húsasmiðjuhlaupið og æfingin á mánudag eiga líklega einhvern hlut að máli. Líklega hef ég ekki verið nógu duglegur að borða orkuríkan mat, því ég hef misst 1,5 kíló á einni viku. Ég hef því innbyrt sérlega mikinn mat síðustu tvo daga og líður mér mun betur.
Í hlaupahópinn bættust við tveir nýjir meðlimir, þau heita Anna og Árni. Ég gleymi þeim nöfnum líklega ekki því ég á tvö börn sem bera þessi fallegu nöfn. Í dag var Yasso dagur. Ég hljóp 10 slíka spretti og manaði svo Guðmund í einn 400 metra sprett í lokin (Gísli... má það ?). Tímarnir á sprettunum voru: 2:57, 2:59, 2:55, 2:54, 2:55, 2:55, 2:54, 2:56, 2:56, 2:53. Ég var kominn í netta endorfín vímu á síðasta spretti og reyndist hann mér í raun léttastur svo einkennilega sem það hljómar. 400 metra spretturinn var á 73 sek. Flesta sprettina hljóp ég á negatífu splitti, ég gaf örlítið í síðustu 200 metrana. Samtals voru hlaupnir 18 kílómetrar í dag.

Mér fann mig vel í dag. Ég hef þá trú að taka þátt í tveimur 10 kílómetra keppnishlaupum með viku millibili gerir mér gott. Nú er bara að missa ekki dampinn og ná amk. 4 æfingum á viku í sumar, þar af tveim með mikill ákefð, eina langa og eina til tvær léttar og þægilegar.

Rykkir á Álftanesi

2007-06-11T23:38:00.000Z

Ég mætti í hópinn minn í fyrsta skipti í allt of langan tíma. Gísli var þar kominn frá útlöndum, þar sem hann hefur dvalið í vellystingum. Hann kveðst nú reiðubúinn að tala inn á fleiri pókerþætti. Einnig voru þar fyrir þær stöllur Harpa og Inga. Teknir voru 6 rykkir, þar sem fjölbreytnin var í fyrirrúmi. Sumir voru upp í mót, en aðrir undan halla eða á sléttlendi. Helmingur rykkjana var á móti vindi og hinn með vindinn í bakið. Þetta gekk allt saman ljómandi vel, en ég er ekki frá því að laugardagurinn sitji örlítið í mér, samtals 11,5 kílómetrar í dag. Kvöldið notaði ég til að festa upp nýtt sturtusett og horfa á lokaþáttinn af Heros.

Húsasmiðjuhlaupið 39:15

2007-06-09T17:05:00.000Z

VIð feðgar tókum þátt í Húsasmiðjuhlaupinu í dag. Björn og Árni hlupu 3 kílómetra og ég 10. Björn varð annar í sínum flokki og hljóp á 14:00, Árni hljóp á 14:30, sem verður að teljast mjög góður árangur hjá ekki eldri dreng.
Sjálfur hljóp ég kílómetrana 10 á 39:15, sem er besti tími minn í mörg ár. Byrjaði að elta Þórólf og tókst það fram á 3. kílómetra, en þá seig hann framúr mér. 50 metrum fyrir aftan mig var Ívar Auðunn og hélst sá munur allt hlaupið. Þetta hélt mér við efnið og ég ætlaði ekki að láta hann komast of nálægt mér. Það tókst sem betur fer og kláraði ég hlaupið með nokkuð örugga forystu á hann. Nú er mánuður í næsta 10 kílómetra hlaup og þá vonast ég til að bæta þennan tíma talsvert. Í mínum villtustu draumum fer ég undir 38:00. Millitímarnir voru annars sem hér segir:

1. 3:37 3:37
2. 3:49 7:26
3. 4:01 11:27
4. 4:13 15:40
5. 4:26 20:06
6. 4:05 24:11
7. 3:49 28:00
8. 3:33 31:33
9. 3:46 35:19
10. 3:56 39:15

Rok

2007-06-06T11:05:00.000Z

Ég skrölti út í krika í gærkveldi, hljóp þar 2 km á 8 mínútum og var ekkert að klára mig þannig lagað. Samtals einungis 5,5 kílómetrar.
Mér finnst vera komið nóg af roki og rigningu í bili. Stefnan er tekin á Húsasmiðjuhlaupið næstkomandi laugardag.

Sunnudagstúrinn

2007-06-03T20:39:00.000Z

Í dag hlóp ég 15km á 75 mínútum. Byrjaði rólega fyrstu 6 kílómetrana, en jók tempóið uppúr því. Gærdagurinn sat aðeins í mér og var ég frekar lúpulegur fram eftir degi.

39:59

2007-06-03T01:17:00.000Z

Heilsuhlaup Laugaskokks og Landsbankans fór fram í dag og tók ég þátt. Það var hlýtt en talsverður vindur. Ég byrjaði frekar hratt og ætlaði að sjá til hvað ég entist. Það gekk ágætlega til að byrja með, en jafnt og þétt dró af mér. Ég tók glæsilegan endasprett þegar ég sá að ég átti möguleika á að skríða undir 40 mínúturnar. Hvattur áfram af starfsmönnum hlaupsins tókst mér að skríða svona líka nett undir þær. Annars voru kílómetrarnir 10 hlaupnir á eftirfarandi tímum:
3:44, 3:42, 4:04, 4:12, 4:14, 3:57, 3:59, 3:59, 4:20, 3:50.

Framkvæmd hlaupsins var frábær og eiga Laugaskokkarar þakkir skildar.

Ég er sáttur miðað við veður og slælega ástundun síðustu vikna.

Er gaman að horfa á málningu þorna ?

2007-05-30T09:54:00.000Z

Það fer eftir því hvar málningin er. Ég notaði hvítasunnuhelgina til að mála húsið mitt og þá er gaman að upplifa það ævintýri þegar málningin þornar ;) Húsið sem fyrir viku var skellótt er nú orðið fagurhvítt. Næstu dagar fara í að mála glugga og handrið og þessháttar smotterí. Eiður langhlaupari Aðalgeirsson hjólaði framhjá húsinu mínu ásamt eiginkonu sinni til margra ára henni Línu og Anítu dóttur þeirra. Leið þeirra lá um Löngufitina. Hann kallar Kára Stein Karlsson millivegalengdahlaupara, af því að hann hefur aldrei farið heilt maraþon !! Það sýnir bara að allt er afstætt. Hann var að klára 100 kílómetra hlaup í Amsterdan

Vegna þessa hefur lítið verið hlaupið, ég fór þó á brettið á föstudag og hljóp 7 kílómetra. Byrjaði á 3 kílómetra upphitun, tók síðan 3 kílóetra á 3:30 - 3:40 tempói og skokkaði svo niður 1 kílómtetra. Vikan sú gerði sig því á 25 kílómetra, sem er full lítið fyrir minn smekk.

Í gærkveldi reimaði ég á mig hlaupaskóna og skeiðaði niður í krika. Tók þar 5x1000 metra með 200 metra rólegu joggi og mínútu hvíld. Tímarnir ekkert til að hrópa húrra fyrir. Tímarnir voru 3:39, 3:34, 3:33, 3:32 og 3:31. Samtals 12 kílómetrar lagðir að baki.

Annaðhvort er maður að þessu eða ekki...

2007-05-22T22:44:00.000Z

Í þar síðustu viku var ég að þessu, hljóp 64 km, í síðustu viku var ég ekki að þessu og hljóp 0 km. Þessi vika ætlar að verða skárri. Skokkskammtur það sem af er 18 kílómetrar. Úr vinnu á mánudegi og í vinnu í morgun. Bæði skiptin á þokkalegu tempói.
Að öðru og léttvægara. Ný stjórn er fædd. Það var léttara yfirbragð á Samfylkingarmönnum. Sumir Sjálfstæðismenn voru glaðir, en aðrir minna glaðir. Glaðastir voru þeir fjandvinir Björn Bjarna og Guðlaugur Þór. Súrust voru Sturla og stelpurnar. Ég er á þeirri skoðun að Geir hafi guggnað á að afsetja Björn og skipa Guðfinnu í hans stað. Þar kemur tvennt til, í fyrsta stað er erfitt að stugga við Engeyjarættinni og í annan stað hefði verið erfitt að láta Björn fara vegna þess að þá hefði þessi ríkisstjórn átt erfitt með að skafa af sér baugsstimpilinn sem framsókn hefur klínt á hana. Björn B getur því þakkað Hreini Loftssyni öðrum mönnum fremur framlengt líf í ráðherrastóli. Mér líst annars vel á stjórnina og vona að hún vinni af heilindum landi og þjóð til heilla.

Langur Laugardagur

2007-05-12T13:29:00.000Z

Ég fór út rétt fyrir 8 í morgun og hljóp inn í Heiðmörk í morgunsvalanum tæpa 11 kílómetra á rólegu tempói, kom heim klukkan 9 og ræsti Árna son minn, því hann átti að mæta á knattspyrnuæfingu hálftíma síðar. Mætti niður í Ásgarð á slaginu hálf tíu og fór aðra ferð upp í heiðmörk með hlaupahópnum. Það var fjölmenni eða 13 manns og er vonandi að það haldi áfram að fjölga í hópnum. Veður var gott þurrt og hóflegur vindur, það er gott að hafa skjól af norðanáttinni í Vífilstaðahlíðinni. Samtals hljóp ég 28 kílómetra í dag, mestallt rólegt (5:30 - 6:10 tempó), en lét freistast að skeiða niður fyrir 4 mínútna tempó niður að hliði (c.a. 2 km). Núna líður mér vel. Vikuskammturinn 64,5 kílómetrar, sem er að ég held með því mesta sem ég hef afrekað hingað til. Dagskrá það sem eftir er dagsins:

1. Kíkja í kosningakaffi Sjálfstæðismanna
2. Fara niður í bæ að skoða risessuna
3. Kjósa rétt
4. Snæða síðbít
5. Horfa á austur-evrovision og kosningasjónvarpið. Sukka í snakki og gosi á meðan

Að gersamlega í aðra sálma þá er hér spá mín um kosninganiðurstöður:

B: 10%
D: 37%
F: 6%
I: 4%
S: 26%
V: 17%

Sjálfstæðismenn og Samfylking mynda stjórn eftir að stjórnarmyndunarviðræður kaffibandalagsins fara út um þúfur vegna prinsippfestu VG.

Nú er bara að sjá hvernig þetta gengur eftir

Yasso á fallegum vordegi

2007-05-10T21:44:00.000Z

Veður fer sífellt batnandi þessa dagana, hitastig stígur hvern dag og hægist á vindi. Í dag var Yasso dagur í Kaplakrika. Gísli var hjólandi og er enn ekki búinn að jafna sig í lærinu. Vonandi nær hann þessari óværu úr sér hið fyrsta.

Ég var léttklæddur, en þó vel innan siðsemismarka. Ég fékk félaga í Yasso sprettunum, Jason fylgdi mér 7 spretti, en Helge 3. Þetta eru menn sem ættu að geta farið 10 km undir 40 fyrir sumarlok ef þeir æfa eins og menn. Mig grunar reyndar að Jason sé tilbúinn til þess núna. Það er mikill munur að hafa einhvern á sama tempói á svona æfingum. Samtals 17,5 kílómetrar í dag.

Sprettirnir voru sem hér segir (hvíldarskokktíminn í sviga)
1. 2:59 (2:52)
2. 3:00 (2:52)
3. 2:57 (2:48)
4. 2:56 (2:52)
5. 2:55 (2:58)
6. 2:54 (2:47)
7. 2:54 (3:11)
8. 2:59 (2:45)
9. 2:59 (2:43)
10. 2:55

Síðan tók ég einn 400 metra sprett í lokin á 1:23 upp á grínið (because I can ;).

Mér leið vel allan tímann og var aldrei alveg að klára mig. Ég er því mjög ánægður með formið á mér þessa dagana og hef ekki komið eins vel undan vetri í 10 ár.

Svo vil ég að endingu leggja það til að við hættum þáttöku okkar í Evróvision. Þetta er eitt stórt samsæri sem við fáum því miður ekki að taka þátt í.

Hver vegur að heiman er vegurinn heim

2007-05-08T21:29:00.000Z

Hljóp ekkert um helgina, en fór þess í stað í smáferðalag um Snæfellsnes með bræðrum mínum á sunnudeginum. Hljóp heim úr vinnu á mánudegi og aftur í vinnuna á þriðjudagsmorgun. Þetta eru rúmir 9 kílómetra leið. Hæg norðan átt og svalt er fyrirtaks veður. Ég hljóp þetta á ágætis tempói og er bara nokkuð ánægður með ástandið á mér þessa dagana.

Icelandair hlaupið...

2007-05-04T00:08:00.000Z

Icelandair hlaupið var haldið í kvöld. Ég tók þátt í fyrsta skipti, veður var ágætt, hægviðri en svalt. Ég ákvað að hlaupa léttklæddur og reyndist það þjóðráð. Byrjaði bratt eins og venjulega, fljótlega fann ég að 1.maí hlaupið sat í mér og reyndi ég að stilla mig eftir því. Það gekk ágætlega að mestu, en rosalega var 6. kílómetrinn strembinn. Ég kláraði hlaupið á 27:05 sem gerir meðal tempó upp á 3:52. Þetta gerir 23. sæti í heildina og 8. í aldursflokku. Ég er nokkuð sáttur við það, en veit að ég á að geta talsvert betur en þetta, jafnvel farið niður á 26:30 á góðum degi eftir næga hvíld (og eins og 3 góðar laugardagsæfingar). Félagar mínir í skokkklúbb Garðabæjar fjölmenntu og voru sjálfum sér og sveitarfélagi til sóma.

Hlaupið til heiðurs hinum vinnandi stéttum

2007-05-01T17:40:00.000Z

Ég var latur um helgina og hljóp ekki neitt (skamm skamm), en við Árni sonur minn keyrðum í dag upp í Grafarvog og þreyttum hið árlega 1. maí hlaup Fjölnis. Þar var við stjórnvölinn Guðlaug Baldvinsdóttir, en við störfuðum saman hjá Hug hf um skamma hríð.
Árni stóð sig eins og hetja og hljóp þessa átjánhundruð metra á 9:44, ekki illa af sér vikið hjá 7 ára snáða. Undirritaður hljóp 10 km og sóttist ferðin greitt fyrri hlutann. Fystu 2 km voru hlaupnir á 7:03, en þá fór að draga af mér, enda hef ég verið of latur við löngu hlaupin. Tíminn við 5 km markið var rétt rúmar 19 mínútur. Bakaleiðin var erfið, því hún var mest á brattann og heldur á móti vindi en hitt. Vindurinn var vaxandi er leið á hlaupið og bísna erfiður mér (og öðrum) á áttunda og níunda kílómetranum, beint í fangið og leiðin upp í móti.
Ég sá það fljótlega upp úr miðju hlaupi að tíminn yrði ekkert til að hrópa húrra fyrir og dró ég því heldur úr ákefðinni seinustu þrjá kílómetrana. Heildartíminn var c.a. 40:49 og er ég nokkuð sáttur miðað við aðstæður og form.

Gæðaæfing á fimmtudegi

2007-04-27T06:46:00.000Z

Það var sannkölluð gæðaæfing í gær. Gæðaæfingar eru víst æfingar sem eru þannig að maður er á mörkunum að ofgera sér. Skipun dagsins voru 8 Yasso sprettir. Það var frekar vindasamt í Kaplakrika (að venju liggur mér við að segja) ogtók það sinn toll þegar á leið. Tímarnir (ásamt hvíldarjoggtímunum) voru sem hér segir:

2:58 / 2:12
3:03 / 2:19
2:59 / 2:33
3:02 / 2:23
3:03 / 2:36
3:07 / 3:18
3:13 / 2:47
3:06 /

Ég var mjög þreyttur eftir þetta og lá eins og slytti allt kvöldið uppi í sófa. Ég þarf greinilega að fara að taka löngu helgarhlaupin af meiri alvöru. Ég fann ekkert fyrir verk í fæti, sem eru góðar fréttir.

Lognið hlær svo dátt í Hafnarfiði

2007-04-24T09:29:00.000Z

Joggaði niður í krika um kvöldið. Mér leist ekki á blikuna því ég fékk verk í vinstri fóturinn við hvert skref strax í upphafi. Á tímabili var ég að hugsa um að labba til baka, en ákvað að harka þetta af mér. Þegar á tratanið var komið hvarf verkurinn eins og dögg fyrir sólu. Ég tók einn 1500 metra sprett í líflegu logninu (skv. skilgreiningu Gísla er alltaf logn í Hafnarfirði). Ég skrölti þetta á 5:15 sem gerir 3:30 tempó. Ég á að geta miklu betur, en var eitthvað lúpulegur. Samtals voru hlaupnir rúmlega 6 km í kvöld.

Ekkert skjól af jökli...

2007-04-22T23:04:00.000Z

Blakhelgin er að baki. Ég var liðsstjóri hjá 3. flokki karla. Liðstjórastarfið er stórlega vanmetið, en það felst í því að smala liðinu á leikina sína, stjórna upphitun og blása liðsmönnum baráttuanda í brjóst. Þetta er geysilega gefandi og skemmtilegt starf, en um leið krefjandi.

Ég hafði hugsað mér gott til glóðarinnar að komast út að hlaupa um miðjan dag þegar langt hlé var á milli leikja. Þetta reyndust tálvonir, því við misstum einn liðsmanninn í meiðsl og því þurfti að sinna af ábyrgð. Meiðslin reyndust ekki alvarleg og varð hann keppnishæfur á sunnudeginum.

Ég komst þó út um kvöldið eftir æsispennandi úrslitaleik í 2. flokki karla, þar sem HK menn sigruðu KA menn í æsispennandi viðureign. Skjólið sem ég vonaðist til að jökullinn veitti var ekkert, því vindáttin var stíf NA átt með úrkomu og sjávarroki. Kílómetrarnir urðu 12 í þetta sinn.

Vikan er því uppá 51 km samtals.

Sumargjöfin í ár

2007-04-20T11:19:00.000Z

Víðavangshlaup ÍR fór fram í gær við mjög góðar aðstæður, þótt hitinn hefði mátt vera örlítið hærri. Framkvæmd hlaupsins var almennt góð, nema hvað tímatakan klikkaði eitthvað. Ég var mjög ánægður þegar ég sá 18:16 á klukkunnu þegar ég skeiðaði undir hana, en það sljákkaði þó aðeins í mér þegar félagi Þórólfur tjáði mér að markklukkan væri 20 sekúndum of sein. Tíminn skv. því er því 18:36, sem er talsvert betra en opinbert markmið og nálægt því sem ég hafði gert mér vonir um (18:30). Um kvöldið fékk ég síðan 34 sekúndur í sumargjöf frá frjálsíþróttadeild ÍR í gær þegar tími minn var skráður 18:02, og ég í öðru sæti í mínum aldursflokki og því sextánda í heildina. Ég afþakka slíkar sumargjafir, því ekki vil ég skreyta mig með gefnum fjöðrum. Gamli ungmennafélagsandinn kraumar greinilega ennþá meðal þjóðarinnar.
Líklega hef ég endað í 25 sæti í heildina og því fimmta í aldursflokki.

Björn sonur minn er að fara að keppa í blaki um helgina í Ólafsvík. Ég fer með sem liðsstjóri. Ég tek hlaupaskóna með og skokka í skjóli jökuls.

Rólegheit

2007-04-17T22:33:00.000Z

Í dag var litli Garðabæjarhringurinn farinn á hóflegum hraða, samtals 8 km í dag. Vikan er komin í 31 km. Nú er stefnan tekin á ÍR hlaupið á sumardaginn fyrsta. Opinbert markmið er 19 mínútur á kílómetrana 5. Óopinbert markmið er talsvert metnaðarfyllra, en verður ekki gefið upp að sinni.

Brekkur bæta

2007-04-17T00:36:00.000Z

Aldrei þessu vant fór ég á mánudagsæfingu hjá skokkhópnum. Gísli er vandaður maður og lét okkur svitna í Hafnarfirði. Tókum nokkrar brekkur í Setberginu. Ég var nokkuð sprækur og fann minna fyrir þessu en ég átti von á. Hefði verið til í einn sprett í viðbót. Við Helge hinn þýski tókum reyndar óvænt og óundirbúið 100 metra spretteinvígi á hitaveitustokknum í Hraunsholtinu. Ég hafði hann á hraðaúthaldinu, en ef Helge æfir sig samviskusamlega held ég að það verði erfitt fyrir mig, kominn á þennan aldur að hafa við honum. Samtals 12,5 km í dag

Leti og páskaeggjaát

2007-04-16T09:56:00.000Z

Ég hef verið latur að hlaupa upp á síðkastið. Það hafa einhver smávægileg meiðsli í vinstra fæti verið að plaga mig. Suma daga er þetta svo slæmt að ég finn til í hverju skrefi, en aðra finn ég ekki fyrir þessu. Sennilega eitthvað í sinabreiðunum .... án þess að ég þykist vera einhver sérfræðingur.

Annars er skýrsla frá síðustu færslu á þessa leið:

Mánudagur 2. apríl: Við Bjössi fórum á hlaupabretti í Ásgarði. Ég byrjaði á brekkuprógrammi. Ég var eitthvað illa fyrir kallaður, en harkaði þetta samt af mér. Samtals 9 km
Þriðjudagur 3. apríl: Skokkaði með hópnum 9 km. Var slæmur í fætinum seinni hlutan af hlaupinu, þótt ekki væri hratt farið.
4 - 14 apríl: Hvíld og páskaeggjaát.
Sunnudagur 15. apríl: Komið nóg af hvíld og tími til að reyna á fótinn. Tók 6 Yassó spretti í Kaplakrika. Tempóið var stöðugt þ.e. 3:00, 3:00, 3:01; 2:59, 2:59, 3:00. Ég er sáttur við það sérstaklega þegar haft er í huga að ég hef ekki hreyft mig í 12 daga og suðvestanáttin var nokkuð frískleg. Ég fann fyrir örlitlum verk í fætinum , en ekkert til að hafa stóráhyggjur af. 11 km í dag.

Yasso á fimmtudegi

2007-03-30T10:07:00.000Z

Bart Yasso heitir kall nokkur í Ameríku sem hefur hlaupið fleiri maraþon en flestir auk fleiri afreka. Við hann er kennd æfing, svokallaðir Yasso sprettir, sem er lýst hér http://www.malbein.net/skokk/?p=253.
Ég hljóp 6x800 metra spretti á 3 mínútum sléttum með 400 metra joggi á 2 mínútum. Þetta gekk allt eftir og er ég bísna ánægður með það. Samkvæmt Yasso fræðunum á ég að geta hlaupið heilt maraþon á 3 klukkustundum ef ég klára 10 spretti á 3 mínútum. Síðasti spretturinn tók aðeins í, þannig að ég áætla að maraþon tími hjá mér sé c.a. 3:10 eins og staðan er í dag. Samtals voru hlaupnir 11 km í dag

Enginn titill....

2007-03-28T23:07:00.000Z

Kláraði Ameríkudvölina með 11 km skokki á föstudaginn, fór rólega allan tímann, tempóið rétt undir 5 min/km.

Í gær hitti ég skokkhópinn eftir langt hlé. Joggaði 9 km út á Álftanes

Í kvöld tók ég netta bretta æfingu. 2 km upphitun, 2,5 km á 3:40 tempói, 1,5 km á 4:00 og 1 á 3:50. Samtals 8 km í kvöld.

Ég varð einnig vitni að því að Stjarnan fékk deildarbikarinn í blaki.

10 mílur á 70 mínútum

2007-03-21T02:34:00.000Z

Skammtur dagsins var 10 mílur á 70 mínútum sem gerir tempó upp á 7 mínútur á mílu. Á mannamáli eru þetta 16 kílómetrar og meðaltempó 4:22 min/km. Ég fór út með því markmiði að hlaupa rólega, því hlaup gærdagsins var frekar hratt. Ekki stóð ég við þetta og yfirleitt var ég á 4:10 tempói, utan km 4 - 6, sem ég var tók á 5:00 tempói. Síðustu 10 kílómetrarnir voru á rétt rúmum 41 mínútu, síðustu 2 km voru vel undir 4 mínútna tempói og síðustu 500 metrarnir voru bísna hraðir (< 3:20). Það sem ég er ánægðastur með er að meðalpúlsinn er ekki nema 161 bpm, og fór ekki upp fyrir 170 fyrr en á endasprettinum.

Það skal viðurkennt að ég er frekar lúinn núna og fæturnir eru eins og spítur. Það er krefjandi að hlaupa stöðuglega á steypu, þannig að ég ætla ekki að hlaupa neitt á morgun. Ætli ég prófi ekki stigvélina sem er hér niðri.

Eftir hlaupið sporðrenndi ég 400 gramma steik með léttbjórnum Budvizer.

Fitubollurnar í vestri

2007-03-20T02:49:00.001Z

Nú er ég í USA, nánar tiltekið í Orlando. Tilefnið er námskeið á vegum bankans, og fyrir áhugasaman heitir það "Optimizing Oracle SQL, Intensive". Ég fer ekki nánar út í það....

Ekki hljóp ég maraþon um síðustu helgi eins og áætlað var. Síðasta vika fór í hálfgert slen og aumingjaskap. Það háði mér reyndar ekki í hinu daglega lífi, en þegar ég reyndi að hlaupa var ég slappur og þreklaust. Ég treysti mér því ekki til að hlaupa 42 kílómetrana. Það bíður betri tíma.

Ég fór hinsvegar 10 kílómetra í dag. Þar af 3 kílómetra á keppnistempói, eða á tímanum 10:23. Hér rétt hjá hótelinu er ríflega 500 metra stígur, sem liggur í kring um snotra tjörn með gosbrunni. Mér leið ágætlega allan tímann og hefði getað farið þetta hraðar. Kannski maður komist undir 10 mínútur í sumar.

Ameríkanar eru holdug þjóð, svo ekki sé dýpra í árinni tekið. Ég er eins og títuprjónn innan um allar bollurnar. Kaninn kjagar út úr bílunum sínum inn á veitingastaðina og úðar í sig 'juicy' steikum og meðlæti. Steikur undir 200 grömmum flokkast sem forréttur á þeim bæ. Á námskeiðinu er einnig séð dyggilega til þess að allir fái nóg að borða. Þar eru á boðstólnum sætabrauð, hnetusmjörsstangir, snakkpokar, gosdrykkir, smákökur og annað sætmeti.

Helgin....

2007-03-12T09:22:00.000Z

Ekkert hljóp ég á Laugardegi, þar sem ég var með verk í fæti. Spurning hvort ekki sé tími til kominn að skipta um skóbúnað. Ég fór rúma 12 kílómetra á Sunnudagskvöldið. Byrjaði löturhægt, en jók tempóið jafnt og þétt. Endaði á meðaltempói rétt undir 5 mín/km.
Í morgun fann ég örlítið fyrir verk í jarkanum, en ekkert til að hafa stóráhyggjur af.

Powerade#6

2007-03-09T00:28:00.000Z

Það blés ekki byrlega klukkan fimm, rigning og talsverður vindur. Fljótlega tók að lægja og rigningin breyttist í fíngerðan úða, sem minnkaði eftir því sem tíminn leið. Þegar ég kom upp í Árbæjarlaug var úrkoman að mestu hætt, en slydda á stígum. Ég var því hóflega bjartsýnn á að ná undir 40 mínútur. Það kom líka á daginn að fyrstu 5 kílómetrarnir voru hlaupnir í slabbi. Það er kannski ofmælt að segja að það hafi verið hált, en ég skrikaði samt í hverju skrefi. Tempóið til að byrja með var í kring um 4:10 og fyrstu 4 km hlaupnir á 16:23. Ég náði að komast niður á 4 mínútna meðal tempó eftir 7 kílómetra. Brekkan var bísna erfið mér og silaðist ég upp hana. Þar tapaði ég rúmri mínútu. Heildartíminn var 41:15, nokkuð nálægt því sem ég hafði vonast eftir með tilliti til aðstæðna. Annar eða þriðji maður á eftir mér reyndist vera fimmþúsundasti maðurinn í mark í Powerade hlaupunum. Mér fannst eitt augnablik að ég væri réttur maður á röngum tíma. Með upphitun og niðurskokki hljóp ég 14 kílómetra í dag. Nú er að gíra sig fyrir fyrsta maraþonið, en það ætla ég að þreyja eftir 9 daga. Planið framundan er því 25 km á laugardag á maraþon hraða og rólegt á þriðjudag og fimmtudag.

Sjósund nei takk

2007-03-07T20:49:00.000Z

Nokkrir vinnufélaga minna eru haldnir kvalalosta, sem lýsir sér í því að hvern miðvikudag fara þeir niður í Nauthólsvík og baða sig í sjónum. Sjórinn er um 2°C þessa dagana og skilst mér að hámark sælunnar sé þegar tilfinningin fyrir útlimum hverfur. Ég fór ekki í sjósund í dag, en skokkaði með tveim félögum mínum, frá Jóni Sigurðssyni að "ylströndinni". Veður var frábært og skokkið var rólegt. Eftir að hafa horft upp á fullorðna karlmenn veltast um í sjónum hélt ég áfram meðfram sjónum. Samtals 10 km í dag, og Powerade á morgun. Ef veður verður hagstætt reyni ég að fara undir 40 mín.

Lengsta hlaup æfinnar....

2007-03-03T11:58:00.000Z

Ég vaknaði snemma í morgun, borðaði staðgóðan árbít og fór út að hlaupa kl 8:15. Leiðin lá í Hafnarfjörð þar sem ég sótti þjálfarann í Suðurbæjarlaugina. Mikil hálka var á götum og stígum og hafði það talsverð áhrif á hraðann. Hlaupahópurinn fór síðan upp í Heiðmörk. Samtals hljóp ég 30 km, meðaltempó 5:30 og meðalpúls 147. Splittið var verulega negatíft, því eftir 15 km var meðaltempóið rétt tæpar 6 min/km. Mér leið vel allan tímann og tel að ég verði tilbúinn í heilt maraþon eftir 2 vikur.

Vikuskammturinn er 51 km.

Á réttri braut....

2007-03-02T09:53:00.000Z

Í gærkveldi var tekin fyrsta brautaræfing vetrarins, mér til mikillar gleði. Gísli er harður húsbóndi og fyrirskipaði pýramýdaæfingu, þ.e. 200, 400, 600, 800, 1000, 800, 600, 400, 200.
Tímarnir reyndust sem hér segir:

------ Tími min/km
- 200 00:33 2:45
- 400 01:19 3:18
- 600 02:05 3:28
- 800 02:50 3:33
- 1000 03:38 3:38
- 800 02:50 3:33
- 600 02:03 3:25
- 400 01:14 3:05
- 200 00:33 2:45

Eins og glöggir lesendur sjá er ég hraðari í seinni hlutanum, ástæðan er sú að ég sparaði mig í fyrri hlutanum, því ég var ekki viss um formið. Það reyndist betra en ég ætlaði og kýldi ég soldið meira á það. En ég neita því ekki að síðustu 200 metrarnir tóku meira í en þeir fyrstu.

Þetta reyndist hin mesta gæðaæfing og 11 km er afrakstur dagsins. Viktin stóð í 68 kg eins og venjulega. Það ætlar að ganga hægt að flísa þessi 3 kg af mér :(

Þriðjudagur til þrautar

2007-02-27T23:59:00.000Z

Fór á brettið 9,5 km, og tók smá í lóðin.

Upphitun 3 km
Hraðaleikur 6,5 km:
1 km rólegt
1 km hratt (tempó <3:30)
1 km rólegt
1 km hratt (tempó <3:30)
1 km rólegt
1 km vaxandi hraði (4:30 - 4:00)
0,5 km rólegt

Ég var eitthvað illa fyrir kallaður til að byrja með, en hresstist þegar á leið. Ég er ekki ennþá dauður úr öllum æðum. Viktin er nokkuð stöðug í 68 kg.

Þreyttur og slappur á Laugardegi

2007-02-24T21:52:00.000Z

Ég er ekki sjálfum mér líkur þessa dagana og var ég þungur á mér í dag. Rúmir 17 rólegir kílómetrar og ég var þreyttur allan tímann. Vonandi hristist þetta slen úr mér hið fyrsta. Markmið komandi viku er meiri svefn, hollari matur og meiri hreyfing.

Nútíminn er trunta....

2007-02-23T00:17:00.000Z

Nútímáþjóðfélag er drifið áfram af dugnaði, og er ég þar engin undantekning. Sökum anna í vinnu og einkalífi hefur hlaupahópurinn orðið að víkja um sinn. Ég vona þó að á því verði nú breyting. Ég hef notað aðstöðuna í íþróttamiðstöðinni okkar garðbæinga á kvöldin. Þar eru mjög góð hlaupabretti sem komast yfir 22 km/klst (sem er meira en heimsmetshraði í hálfu maraþoni).
Skammtur kvöldsins var tæpir 7 km, sem samanstóð af 2 km upphitun á 5:00 tempói, brekkupýramída (3,4 km) og hröðum 1,2 km. Ég var ekki eins sprækur og síðast þegar ég tók þessa æfingu og hægði á mér um miðbik. Sennilega sitja hlaup helgarinnar enn í mér.

Sprengidagur

2007-02-20T23:24:00.000Z

Át saltket og baunir í hádeginu og um kvöldið. Talsverður gæðamunur þar á, og var saltketið hér heima mun betra en mötuneytissaltketið (sem þó var með skásta móti). Skakklappaðist 7 km á brettinu í kvöld. Byrjaði á 3 rólegum kílómetrum (reyndar með góðum endaspretti síðustu 400 metrana). Kíkti aðeins í tækin og endaði svo á 4 kílómetrum með stigvaxtandi hraða (17:44). Náði að hlaupa úr mér verstu harðsperrurnar eftir átök sunnudagsins.

Meistaramót öldunga innanhúss....

2007-02-18T21:37:00.000Z

Það datt í mig að taka þátt í Meistaramóti Öldunga í Laugardalshöllinni. Ég keypti forláta Adidas gaddaskó í Útilífi fyrir 2 vikum á spottprís og fannst tilvalið að vígja þá núna fyrr í dag. Upphaflega ætlaði ég bara að keppa í 3000 metra hlaupi, og stefna á að hlaupa á 10:30. Vegna áeggjan Steins Jóhannssonar lét ég líka vaða á 400 metrana, þrátt fyrir að aðeins væri 1 klst á milli hlaupa. Það er skemmst frá því að segja að ég hljóp fram úr mínum björtustu vonum. 400m/63,09 sek og 3km/10:24,33 sek er afrakstur dagsins.

400: Ég sparaði mig í 400 metrunum, og hljóp fyrri hringinn í 400 metrunum frekar afslappað, Seinni hringurinn var tekinn á meira trukki. Mér leið vel allan tímann og hef á tilfinningunni að ég geti hlaupið auðveldlega niður á 60 sek.
3000: Ég tók forystu strax og hélt henni fyrst um sinn, Starri nokkur Heiðmarsson (sem ku vera hálfbróðir þeirra Margeirsbræðra skv. öruggum heimildum) andaði allan tímann ofan í hálsmálið á mér og tók framúr mér um miðbik hlaups. Ég reyndi að líma mig á hann, en hann jók forystuna um 1-2 metra á hring. 400 metrarnir sátu verulega í mér og mér leist ekki á blikuna þegar 3 hringir voru eftir, orðinn lúinn og nett sýrður. Hvattur áfram af félaga Steini og Jóhanni Ingibergs minnkaði ég bilið örlítið á næst síðasta hring og þegar 200 metrar voru eftir fann ég auka orku, gaf allt í botn og hljóp fram úr keppinaut mínum þegar 150 metrar voru eftir. Starri átti ekki svar við þessu og endaði c.a. 3 sekúntum á eftir mér.

Ég er mjög sáttur við afraksturinn og kom sjálfum mér mest á óvart. Ég er bara rétt að byrja ;)

Halló Akureyri

2007-02-18T21:27:00.000Z

Í síðustu viku varfjölskyldan í höfuðstað norðurlands í tilefni af vetrarfríi í Flataskóla. Fjölskyldan stundaði skíðaíþróttina frá mánudegi til fimmtudags 2 - 4 klst á dag. Allir tóku stórstígum framförum. Á föstudaginn var bálhvasst í Hlíðarfjalli og brugðum við okkur í lognið á Dalvík og skíðuðum í Böggvistaðafjalli í fyrsta, en ekki síðasta sinn. Snjór var nær enginn fyrir norðan og ef ekki væri búið að finna upp snjógerðarvélar væri fátt um fína drætti. Nú er talað um það af fullri alvöru að setja upp skíðalyftu á Kaldbak.

Húsbóndinn komst tvisvar út að hlaupa.

Miðvikudagur: Tók sýruæfingu í kring um flugvöllinn í launhálku og norðan kalda. 5,1 km á 20 mínútum, samtals 11,3 km
Fimmtudagur: Brekkuæfing, 6x250 metrar á 1.03 - 1.16 sek. Brekkan var brött og ég er sáttur. Samtals 8,3 km

Powerade #5

2007-02-09T00:32:00.000Z

Ég telfdi fjöltefli við páfann framan af degi, og var ekki viss um hvort ég kæmist í hlaupið. Það skánaði allt þegar leið að kveldi, svo ég ákvað að láta slag standa. Kom upp í Árbæjarlaug kl 19:50 og rétt náði að skrá mig og heilsa þeim sem vildu kannast við mig.
Veðrið var frábært, vægt frost og þéttur snjór á stígum. Ég hljóp án hálkugorma og reyndist það rétt ákvörðun, því snjórinn var stamur. Tempóið var nokkuð jafnt miðað við hvað brautin er hæðótt. Ég var sprækur framan af og var að mér sýndist í c.a. 10 sæti þegar 3 km voru að baki. Þá var þreytan aðeins farin að segja til sín og 3-4 jogguðu framúr mér á 4. kílómetra. Eftir það fór ég fram úr einum og einn fram úr mér. Rafveitubrekkan var erfið, en þó ekki eins og í fyrstu tveim hlaupunum, svo ég tali nú ekki um í fyrra. Trausti Valdimarsson dró verulega á mig í brekkunni svo ég þurfti að gefa vel í síðasta kílómetrann. Sem betur fer keyrði hann sig út í brekkunni, þannig að ég náði að hafa hann á síðustu 500 metrunum. Tíminn var 41:45 og meðaltempó því 4:11. Garmurinn var óvenju nákvæmur, og mældi hann vegalengdina 9,99 km. Það bar helst til tíðinda að félagi Þórólfur var á eftir mér, en mig grunar að hann hafi slegið slöku við æfingar eftir að hann gerðist pabbi.

12 á þriðjudegi

2007-02-06T21:05:00.000Z

Í dag hljóp ég samtals 12 rólega kílómetra. Ég var þreyttur í dag, líklega ávöxtur æfinga undanfarinna daga. Vonandi hristi ég þetta af mér fyrir fimmtudaginn. Ef ekki, þá verður bara að hafa það.

Ekkert mál

2007-02-05T23:42:00.000Z

Tók góða brettaæfingu í kvöld tæpa 10 km auk 300 metra sundspretts á eftir. Æfingin var sem hér segir:

Upphitun 2,8 km á 4:48 - 5:00 tempói. Púls 130 - 135 bpm
Brekkupýramídi á erfiðleikastigi 10. 3,55 km púls 169 - 172 bpm
3,2 km hratt (12:30) byrjaði í 4:17 en jók hraðan fljótlega í 4:00 og 3:46. Púlsinn var stöðugur í 170 - 173 og ég leyfði mér að auka hraðan hressilega síðustu 500 metra. Hraðast fór ég 2:43 og fór létt með það.
Rólegt jogg 300 m

Formið er á hraðri uppleið, en nú er verkefni næstu 2 mánaða að ná viktinni aðeins niður, því nú sýndi hún 68,2.

Þetta er allt að koma

2007-02-04T22:02:00.000Z

24 km á laugardagsmorgni á 5:06 meðaltempói. Snjór yfir öllu og stöku hríð, hiti um og undir frostmarki. Leiðin lá inn í Kópavog fyrir Kársnesið og upp Fossvogsdal og Elliðaárdal upp að stíflu. Hljóp síðan sömu leið til baka, nema hvað ég stytti mér leið í Kópavoginum. Þetta var tekið á negatífu splitti og voru síðustu 12 kílómetrarnir hlaupnir á c.a. 4:50 tempói.

Vikuskammturinn 57 kílómetrar og formið er á uppleið.

Nú ætla ég að gíra mig inn á Powerade hlaupið á fimmtudaginn, það þýðir væntanlega erfið en snörp æfing á mánudag og rólegt á þriðjudag með nokkrum stuttum hraðaaukningum.

3 km á 10:55 !!

2007-02-01T22:57:00.000Z

Í kvöld fór ég á bretti 9 km. Þetta var frekar áköf æfing, upphitun og niðurskokk frekar hratt með 3 km á miklum hraða, hélt 3:42 tempói allan tímann og bætti í síðustu 500 metrana.

2 km frekar hröð upphitun (10:00)
3 km mjög hratt (10:55)
4 km á vaxandi hraða (18:55)
samtals: 9 km / 39:50

Mér leið vel allan tímann og fékk aldrei á tilfinninguna að ég væri að klára mig. Formið er því allt að koma og spennandi að sjá hvað kemur út úr powerade hlaupinu eftir viku.

Viktin er á réttri leið 66,95 kg.

Ég er brettatöffari

2007-01-31T00:08:00.000Z

Síðasta vika var frekar klén, en þessi ætlar að verða skárri. Samtals hef ég lagt að baki 27 km og stefni á amk 60, með löngum laugardegi.

Ég komst ekki í hlaupahópinn á laugardaginn, en rolaðist 7 km á 40 mínútum á sunnudeginum. Tók tíkina með og var hún frekar leiðinleg þennan dag og nennti ekki að hlaupa. Ég þurfti því að draga greyið hálfpartinn á eftir mér. Það var rigningarúði og ég ekki í stuðinu.

Tók brekkupýramýdann í gærkveldi (3,36 km). Byrjaði á erfiðleikastigi 10 og hélt hann út í c.a. 9 mínútur og minnkaði þá hraðann hressilega, enda hallinn 14% og ég orðinn andstuttur. Jók þó aðeins við ferðina í lokin. Þegar ég held út 18 mínútur á 10 er ég orðinn nokkið góður held ég. Þessi æfing finnst mér hjálpa mér mikið í brekkuþoli. Að öðru leyti var þessi æfing 2 km upphitun og 2,6 km á vaxandi hraða, byrjaði í 13 km/klst og endaði í 18-20 km síðustu 200 metrana. Samtals 8 km. Viktin var jákvæð og sýndi 67,4 kg. Ég stend enn við að vera kominn niður í 64-65 kg í vor.

Í kvöld var hlaupinn stóri Garðabæjarhringurinn samtals 12 km á sléttum klukkutíma. Þetta ver negatíft splitt. Fyrri hluta leiðarinnar var ég samferða hlaupahópnum, en síðri hlutinn hljóp ég í kring um Ása hverfið og kláraði kílómetrana 12 á hitaveitustokknum. Það var launhált í kvöld.

Íslendingar féllu með sæmd í viðureign sinni við Danmörk í HM í handbolta. Miðað við höfðatölu þjóðanna unnum við hinsvegar stórsigur.

Fjör á föstudegi

2007-01-27T00:21:00.000Z

Það er nóg að gera í vinnunni, þannig að það gefst minni tími til kroppatamninga en venjulega. Ég skrapp þó á brettið í kvöld og tók smá í tækin á milli setta. 7 km samtals sem samanstóð af 2 km upphitun á 10 mínútum, 3 km hratt á 11:25 og síðan 2 km þar sem ég tók 2x(500 þokkalegur hraði + 500 hratt) á samtals 8 mínútum. Þetta tók hressilega í og finn ég að formið er ekki alveg upp á sitt besta.

Strákarnir okkar.....

2007-01-23T00:15:00.000Z

Strákarnir okkar spiluðu á röngunni í gær, en réttunni í dag. Ég vara samt við of mikilli bjartsýni, því það þarf að halda mótið út. Frakkaleikurinn var sigur varnarinnar með þá Alexander, Sigfús og Sverri í broddi fylkingar og Birki í geigvænlegu stuði í fyrri hálfleik.

Læddi mér á brettið eftir leikinn og tók brekkupýramídann. Byrjaði á erfiðleikastigi 10, en fann fljótt að ég var ekki í stuði í kvöld og þurfti að minnka hraðann í brattasta kaflanum. Náði þó að fara 3.35 km á þessum 18 mínútum og samtals 5 km þegar upphitun er meðtalin. Púlsinn var > 180 í 14 mínútur og telst þetta því vera góð sýruæfing. Viktin sýndi 68,5 og verð ég að fara að taka mig á til að koma henni niður í 65 fyrir maí eins og yfirlýst markmið er.

13 - 10

2007-01-21T01:18:00.000Z

13 km rólegt um Garðabæ og Kópavog í 10° frosti og stillti veðri. Veðrið var fallegt og félagsskapurinn góður.

Seint telst ég sundmaður góður...

2007-01-18T00:52:00.000Z

Ég hef aldrei verið þekktur fyrir sundfimi, þó ég teljist þokkalega syndur. Skriðsundið hjá mér er mikill bægslagangur og notast ég því mest við bringusundið og baksundið. Ástæðan fyrir því að ég er að básúna þetta er, að ég synti í kvöld heila 1100 metra á sléttum hálftíma. Lengra hef ég aldrei synt í einu. Þetta kom ekki til af góðu, því ég ætlaði á brettið. Ég uppgötvaði svo að ég hafði gleymt stuttbuxunum heima Þar sem ég er spéhræddur maður og annt um mannorðið, kunni ég ekki við að hlaupa á sundskýlunni. Sundið tók þokkalega í, þar sem ég er ekki vanur slíkri hreyfingu í þessu magni. Í heild er ég sáttur við afrekið og mikið var gott að svamla í heita pottinum á eftir.

Gæðaæfing

2007-01-14T11:31:00.000Z

Það var fjölmennur hópur sem lagði upp frá sundlaug Garðabæjar að morgni laugardags. 12 manns og ein tík fóru í halarófu upp í Heiðmörk og pjökkuðust áfram í þungu færi. Veðrið var gott, vægt frost, gola og smáhríð öðru hvoru. Það var sérstök stemming að hlaupa í gegn um fallegan furulund í hríðarkófinu. Askja mín var alsæl í snjónum lagði að baki talsvert lengri leið en ég. Þegar út á veg var komið stóðumst við Grétar ekki mátið og tókum nokkra hressandi hraðaaukningar. Að hlaupa í svona færi reynir allt öðruvísi á mann en venjulega. Ökklar og kálfar styrkjast sérstaklega og hraðaaukningarnar upp og niður brekkur taka hressilega í lærvöðva. Það sat í mér þreyta eftir Powerade hlaupið og var ég þægilega þreyttur það sem eftir lifði dags. 13,8 km lagaðir að baki í dag og vikan samtals 33 km. Þetta var góð vika og erfiðari en kólómetrafjöldinn segir til um. Nýliðarnir í hópnum eru efnilegir og það verður gaman að kljást við þá þegar líða tekur á árið.

44:20 í þæfingsfærð

2007-01-12T00:44:00.000Z

Powerade fór fram í kvöld, 110 þáttakendur og stemmingin góð. Veður var ágætt, en eftir ríflega snjókomu dagsins var færið erfitt, hálkugormar voru málið. Ég byrjaði brattur, fullur sjálfstraust og hélt ágætum hraða mestallt hlaupið. Ég hengdi mig fljótlega aftan í Þórólf (nýbakaðan föður) og tókst furðanlega að halda í við hann. Rafveitubrekkan var tekin með trukki og fór ég fram úr Þórólfi, en efst í henni dó ég gersamlega og Þórólfur fór fram úr mér við annan mann (skynsamur maður Þórólfur). Ég staulaðist meðfram lóninu í mark.
Þetta var frábært hlaup og mjög góð tempóæfing.

Veikasti hlekkurinn

2007-01-09T00:30:00.000Z

Joggaði rösklega heim úr vinnu 9,2 km á 40:30. Kalt í veðri, en stillt. Ein tánöglin datt af þegar ég var að snyrta þær. Táin er búin að vera að angra mig síðustu daga og endaði á þennan veg. Þetta þykir mér leitt, en sennilega er skynsamlegt að taka smá hlé frá hlaupum.

Langur laugardagur

2007-01-06T13:03:00.000Z

Það var mjög gott hlaupaveður í dag, vægt frost og hægur vindur. Hlaupahópurinn var óvenju vel mannaður í dag, þar sem þrír fræknir nýliðar mættu. Allt eru þetta menn sem hafa stundað boltaíþróttir af kappi á yngri árum (án þess að ég sé að gefa í skyn að þetta séu aldraðir menn, enda yngri en ég). Hlaupið var upp með læknum og upp í Heiðmörk. Nýliðarnir skildu við okkur hjá mastrinu, en ég, Gísli, Sveinn og Grétar fórum lengri leiðina heim. Samtals hljóp ég 21 km á 2 kls og 2 mínútum, meðal púls var 142bpm. Það er langt síðan ég hef hlaupið svona langt og situr þetta rólega hlaup því meira í mér en ella.
Samtals hef ég því hlaupið 45 - 46 km í þessari viku.

Innipúki....

2007-01-04T22:27:00.000Z

Ég daðra við hlaupabretti þessar vikurnar. Í gær hljóp ég 1 km upphitun og 5 kílómetra á brekkuprógrammi þar sem hlaupið var í 2 mín/0% halla + 2 mínútur/5% halla, þetta gerði ég á stöðugum 4:36 min/km tempói.
Í kvöld fór ég niður í Ásgarð og tók 7 km á brettinu, sem skiptist þannig:

Upphitun - 2 km á 5:00 tempói
Píramídinn 3,3 km á 18 mínútum á erfiðleikastigi 9 , reyndar jók ég hraðann talsvert um miðbik. Næst prófa ég erfiðleikastig 10.
Hratt á 0% halla 2,7 km á 10 mínútum. Byrjaði á 4:00 og jók hraðann jafnt og þétt niður í 3:20.

Á milli setta fór ég í tækin og tók maga, brjóst og handleggi. Teygði vel í heita pottinum á eftir.

Uppgjör ársins

2007-01-01T21:33:00.000Z

Um áramót er til siðs að líta yfir farinn veg síðustu 12 mánaða og horfa fram til næstu 12. Heilt yfir er ég sáttur við árið. Það byrjaði ekki vel þar sem ég fór illa í bakinu á aðventunni og byrjaði ekki að hlaupa af viti fyrr en í mars. Ég kom mér í ágætis form og hljóp Heilsuhlaup Krabbameinsfélagsins á 40:20 í strekkingsvindi. Um hvítasunnuhelgina slasaðist ég aftur í baki og var frá í 3 - 4 vikur af þeim 0rsökum. Ég æfði vel í sumarfríinu, sérstaklega þegar við fórum á vestfirðina. Meðal annars fór ég inn og út Reykjarförðinn 23 km og upp á Breiðdalsheiði 2 dögum síðar 22 km. Í kjölfarið fórum við til Svíðjóðar og tókst mér að hlaupa sæmilega þar, þrátt fyrir merltingarfæratruflanir með tilheyrandi vökvatapi. Selfosshlaupið voru vonbrigði þar sem ég ætlaði að ná undir 40 mínútum, en veðrið gerði þann draum að engu. 3 km endasprettur í strekkingsmótvindi var of mikið fyrir mig. Ég hljóp 1/2 maraþon í haustmaraþoninu á 1:26:57 og var ég alsæll með það. Einnig hljóp ég 3 poweradehlaup á þokkalegum tímum. Árið endaði svo með stæl á 39:26. Þar með var aðalmarkmiði ársins náð.

Árið sem er að ganga í garð er óskrifað blað, en ég stefni á að bæta besta árangur minn í 10 km götuhlaupi. 38:21 er tími sem er viðmiðið þetta árið. Það verða liðin 10 ár frá því að ég náði þessum árangri og er því viðeigandi að reyna að bæta það. Svo stefni ég á að fara niður á 1:24 í hálfu og debútera í heilu (ég gef ekki upp áætlaðan tíma).

Á elleftu stundu !!

2007-01-01T02:12:00.000Z

Langþráðu takmarki náð í gamlárshlaupi ÍR, 10 km voru farnir á undir 40 mínútum, nánar tiltekið 39:26. Aðstæður voru frábærar, logn og hiti við frostmark. Ég byrjaði hlaupið hratt og voru fyrstu 5 kílómetrarnir á 19:15. Það var launhált á Seltjarnarnesinu, þannig að það dró aðeins af mér á 6. kílómetra, en með góðri aðstoð Dags Egonssonar og spretti niður Tjarnagötuna tókst mér að ná takmarkinu.

Árið verður annars gert upp í sér pistli....

Litla kakóhlaupið og jólasteikur...

2006-12-28T11:22:00.000Z

Það hefur lítið verið hlaupið á aðventunni af ýmsum orsökum. Tíðin hefur verið með eindæmum leiðinleg og einnig hefur verið nóg að gera í undirbúningi fyrir hátíðarnar.
22. des: Litla kakóhlaupið fór fram með viðhöfn og hlupum við 4,5 km um ljósum prýddar götur Garðabæjar. Jólatréð þeirra Hörpu og Engilberts var valið fallegasta jólatré bæjarins og segir í umsögn dómnefndar að þar sé á ferð látlaust, en fagurskapað tré sem nái vel þeirri lágstemmdu hátíðarstemmingu sem einkennir hin fyrstu jól á Betlehemsvöllum.
25.des: Ég vaknaði á undan öðrum fjölskyldumeðlimum og hljóp 10 kílómetra rólega. Frekar þungur á mér eftir veisluhöld undangenginna daga.
27. des: Hljóp rösklega heim úr vinnu með þéttan sunnanblæ í fangið. Kílómetrarnir 9,2 voru hlaupnir á 40:10. Ég var frekar þungur á mér og þreyttur
28. des: Hljóp í vinnu við svipaðar aðstæður og í gær, en vindurinn þó frekar í bakið, mjög þungur á mér og þurfti stundum að fara fetið í myrkrinu Síðustu 2 kílómetrarnir voru þó teknir með trukki og dýfu og náði ég að taka 9 km rétt undir 40 mínútur.

Nú er stefnan tekin á gamlárshlaupið og vonandi verða aðstæður góðar í þetta sinn...

Laugardagur til lukku

2006-12-16T13:36:00.000Z

Tölti í Hlaupahópinn, þar sem voru mætt Gísli, Jón Bæring, Grétar með Skrámu og Harpa með Engilbert. Það var happafengur, því Engilbert er sprækur með eindæmum. Hlupum rólega út á Álftanes. Gísli hljóp heim á spíssnum og tók Engilbert þá á rás. Ég fylgdi honum stóra Álftaneshringinn og heim. Tempóið fór nipur í 4:20 og var ég bísna lúinn eftir þetta, enda ekki alveg búinn að jafna mig eftir Powerade hlaupið, sem situr enn í mér. Nú er bara að vona að Engilbert láti sjá sig oftar svo maður fái nú að spreyta sig á alvöru hlaupara (ef einhver úr hópnum les þetta þá bið ég hinn sama um að reyna að móðgast ekki). Samtals 15,3 km í dag og vikan gerir sig á 35 km.

Powerade #3

2006-12-14T23:30:00.000Z

Powerade hlaupið fór fram í kvöld í froststillu. Snjór og svell var á göngustígnum og færið því örlítið hált, þrátt fyrir að ég væri á hálkugormunum. Tíminn var svipaður og ég bjóst við 41:43. Ég lagði frekar rólega af stað eða á rétt rúmlega 4 mínútna tempói. Hlaupið var áreynslulítið, sem borgaði sig í rafveitubrekkunni, en þar tíndi ég upp einn. Þar áður hafði ég tekið fram úr tveim hlaupurum. Þetta er ánægjuleg tilbreyting, því yfirleitt hefur þetta verið á hinn veginn. Minnstu munaði reyndar að ég drægi Írisi Önnu uppi, en það munaði 10 metrum að það tækist.
Kuldinn reyndist mér erfiður ljár í þúfu, og það var ekki fyrr en á 5. kílómetra að ég fékk hitatilfinningu í fingurna. Í heild hljóp ég 13 km í kvöld og þriðjudagsæfingin sat lítið sem ekkert í mér.
Ég ætla að leggja áherslu á róleg og löng hlaup fram á þorrann, með stöku hlaupabrettasprettum.

Kapp frekar en forsjá

2006-12-13T09:22:00.000Z

Ég held áfram að vera innilegukind. Tók góða brettaæfingu, þ.e. 2 km upphitun og 18 mínútna brekkuæfingu. Nú tók ég erfiðleikastig 8 og réð bærilega við það, kíldi hraðan meira að segja hressilega upp síðustu 3 mínúturnar, samtals 3 km þar. Að lokum tók ég einn hraðan kílómetra (vaxandi hraða) á 3:50. Endaði í 20 km/klst eða 3 min/km. Samtals 6 km í dag. Þetta er sennilega ekki skynsamlegt m.t.t. þess að powerade hlaup er á fimmtudaginn, en ég lít á powerade hlaupin sem tempóæfingar og þar sem ég hef ekki verið að Veðurspáin er hagstæð, hiti í kring um frostmark og hægur andvari. Vonandi verður færið sæmilegt, en hætt er við að það verði svellbunkar hér og þar.

Innipúki

2006-12-09T16:33:00.000Z

Ég er orðinn innipúki, og það kemur ekki til af góðu. Ég er búinn að vera með kvef undanfarna daga og því ekki þorað að hlaupa úti í kuldanum. Fór því á bretti í morgun, en hitti hlaupafélaga mína í anddyrinu á Ásgarði. Samtals 9 km, þar af voru 5 hraðir (18:33). Ég hljóp þetta á engum halla, þar sem mér er í mun að ofgera mér ekki. Hinir 4 voru hlaupnir fyrir og eftir sprettinn og voru á þægilegum saltketshraða. Ég laumaði mér í lyftingatækin á milli átaka. Gott að taka heita pottinn og gufubaðið út á eftir.

Nútíminn er trunta

2006-12-06T10:46:00.000Z

Ég hef lítið komist í hlaup að undanförnu. Kálfameiðslin síðan á fimmtudag sátu í mér á föstu- og laugardag, en núna er ég orðinn góður af þeim. Lennti í smá vinnutörn svo ég komst ekki í hlaupahópinn í gær, en fór þess í stað á hlaupabretti í Ásgarði um kvöldið. Ég var hálftíma á því og hljóp 6 km. Tók 18 mínútna brekkuprógram, þar sem hallinn fór upp í 14%. Ég var fullur sjálfstrausts og stillti erfiðleikastigið á 10 (af 12). Það reyndist allt of erfitt svo ég lækkaði hraðann. Ætli ég prófi ekki 8 næst. Eftir þetta tók ég 2,8 km á 4:12 tempói til að byrja með, en jók hraðann síðustu 500 metrana. Gott að slaka á í heita pottinum á eftir.

Góðar og slæmar fréttir

2006-11-30T14:23:00.000Z

Fór á brettið í hádeginu, 5 km á 16 km/kls hraða allan tíma og max halla upp á 3%. Tíminn var 18:45. Púlsinn steig nokkuð jafnt og þétt upp í 180. Það er eitthvað annað en á mánudagskvöld þegar hann rauk upp á fyrstu 3 mínútunum á sama hraða og ég þurfti að hægja ferðina verulega. Þetta voru góðu fréttirnar. Slæmu fréttirnar eru þær að ég tognaði lítillega í kálfa eftir átökin. Líklega vegna þess að ég hitaði ekki nógu vel upp .... reyndar hitaði ég alls ekkert upp :D, því þetta átti að vera skyndiæfing. Kannski verð ég vitrari með hækkandi aldri. Ég verð vonandi orðinn góður á laugardaginn kemur.